Muaythai inelna lian awm dawn

Muaythai Association of Mizoram leh LPS Vision ten inremna an ziak fel, kumin October-ah a duh apiang tel theihna tur LPS Pro Muaythai an buatsaih dawn.

Zirtawpni khan LPS office, Zarkawtah LPS director Lalsawmliana Pachuau leh Mizoram muaythai hruaituten inremna an siam fel a, muaythai amateur dan sang ber hmangin cage chhunga khelh tur a ni a, weight hrang pangaah champion kawnghren an inchuh ang.

Kg 48 hnuai, kg 54 hnuai, kg 61 hnuai, kg 67 hnuai leh kg 75 hnuaiah huam zau takin a duh apiang, contact sports tuipui tawh phawt tel theihna turin huaihawt a ni dawn a, quarterfinal lut chinin lawmman an dawng dawn a ni.

Khawvel huap muaythai hruaituten kum 30 an beih hnuah nikum July khan International Olympic Committee chuan Olympic Games-a tel thei turin muaythai game a pawm.

Mizoram muaythai hruaitute chuan khawvel huap inelna sang bera Mizo ṭhalai an tel theih nan theihtawpin hma an la a, LPS Pro Muaythai hmangin hmasawnna leh rahbi awmze nei zawk tuk theih an inbeisei a ni.

Kum 2010 khan LPS leh Mizoram Muaythai-in championship a buatsaih tawh a, kum 12 hnuah hmuhnawm leh changtlung zawka huaihawt a nih theih nan cage chhunga fighter-te an inbei dawn a, amatuer huanga invenna tlem thei ang bera khelh a ni dawn a, kiu venna, elbow guard chiah an hmang dawn.

Mizoram Muaythai pre-sident Brian Lalnunhlima chuan, "Olympic Games thlir chunga hmalakna a nih piah lamah, Mizo ṭhalaite inbeihna tak tak tur a ni a, Muaythai khelh dan hrang hrang zingah pawh invenna tlem ber kiu venna chauh an hmang dawn a, ring chhungah ni lovin tunlaia lar tak One Championship angin cage chhungah an inhmachhawn dawn a ni," a ti.