Suarez-a'n fans vangin Nacional a zawm

European striker 'hot' ber pawl ni reng ṭhin Luis Suarez chuan Europe, middle-east leh USA lam aṭanga sawmna a neihte hnarin, a puanthuah nen Uruguay lam pan a thlang a, amah siam liantu Nacional-ah fan-te duh ang ngeiin a khel dawn.

Suarez hi Liverpool tana a khelhpui ṭhin Steven Gerrard-a enkawl Aston Villa nen pawh sawizawm a ni a, kum 35 mi ni tawh mah se goal khung a la ṭhulh loh avangin club tam tak chil a la tiput pha.

Mahse, Suarez chhertu Nacional fan-ten tun hnai khan Suarez an duhna nasa takin an lantir a, kar hmasaa 5-0 a Cerrito an sawpna inkhelah fans 20,000 velin Suarez hmaikawr vuahin, an striker chhuanvawr chu an hnena kir turin an sawm.

Hei mai hi a ni lo - fans tam takin #suarezanacional tih kengin inkhel an en a, social media lamah nasa takin an pholang bawk. A tawpah Suarez an hmin a, kum 18 mi lek ni chunga a professional match hmasa ber a lo khelh tawhnaah Suarez a kir ta.

Liverpool leh Barcelona striker hlui Suarez chuan, "Nacional kawr ka ha leh thei ta hi ka inchhuang a, min thlawpna zawng zawngah lawmthu ka sawi - kan inhmu thuai dawn nia," tiin an ram club a zawm thu hi a puang.

Kum 35 mi Suarez hian, "Video leh message kan dawn zawng zawng hian min hneh takzet a, thutlukna siam kan ngaih hunlai takin kan thinlung a hneh hle - Nacional tana inlan lehna chance ka neih hi hnar phal chi a ni lo," tiin fan-te duhna chuan a hneh thu a lo sawi tawh.

Suarez hian Nacional-a a hun hmasa lamah match 35 khelhsakin goal 12 a khung a, Uruguay Primera División-ah champion nomawi a chawipui - European football-a hlawhtlinna tam tak a chhar hnuah hlawhtlinpui leh a tum dawn.

Nacional hian South American football-a club inelna sang ber dawttu, Copa Sudamericana-ah quarterfinal an lut tawh a, Brazilian club ṭha Atletico Goianiense nen an intawng dawn.

Kum 1989 hnua khawmualpui inelnaa nomawi la chawi leh lo Nacional tan tun hi chance ṭha a ni a, Suarez hian Copa Sudamericana-ah a champion pui thei a nih ngat chuan ngaihsan a hlawh lehzual ang.

Uruguay tan vawi 132 inlana goal 68 khung a, ram tana goal khung hnem ber ni mek Suarez-a contract rei zawng hi tarlan a ni lo a, mahse, World Cup 2022 thleng atan a club hluiah hian contract a ziak nia sawi a ni.

Nacional chuan, "I in ngeia ilo kir leh ta hi kan lo lawm a che," tiin an striker hlui an lawm a, khawvelin a club thar tana a match hmasa ber a khelh leh hun tur an thlir mek.

Suarez hian kum 2006 khan Nacional hi chhuahsanin Groningen a zawm a, season khat hnuah Ajax tana khelin Liverpool, Barcelona leh Atletico Madrid-ah te a kal leh a, a hming a chher hle.

Barcelona-ah hian match 283-ah goal 198 khungin, La Liga (4), Copa del Rey (4), Supercopa de Espana (2), Champions League (1), UEFA Super Cup leh FIFA Club World Cup (1) ah champion nomawi a chawi thei a ni.