Foxes-in Newcastle dilna an hnawl

Leicester City mid-fielder James Maddison lei tumin Newcastle United an thawk chhuak a, pound maktaduai 40 hum chungin an dawr - mahse Foxes chuan Magpies dawrna hi an lo hnawlsak.

Brendan Rodgers enkawl Leicester City hian tun nipui bazar chhungin player lakluh an la nei lo, player thar lakluh an harsat avangin an neihsa hum theih a pawimawh, an player ṭha zinga mi chhuahtir chu an hreh khawp ang.

England international Maddison hian King Power Stadium-ah kum hnih daih contract a la nei. Transfer in hawn apiangin club dangin an ngaihven zinga mi a ni ṭhin, mahse tun ṭumah pawh a chhuak dawn em, tih a la chiang lo.

Sum ngah thar Magpies erawh an bazar chhunzawm zel. Nipui chhungin defender pahnih Sven Botman leh Matt Targett te bakah goalkeeper Nick Pope an lalut tawh.