Mayweather leh McGregor August 26-ah an inhnek dawn

An in cho a, an in vau a, tlanchhiaah an inpuh a, tlawm zawk nih an duh lo ve ve - engkim chinfelin a awm dawn ta. August 26 khian boxing khawvela hming dai tawh ngai lo tur Floyd Mayweather leh UFC champion Conor McGregor-te chu Las Vegas khawpuiah an inhnek dawn ta.

Vawi 49 inhnek a hma­chhawn tawha tlawm hmel la hmu lo Mayweather chuan Irish fighter nena an inhnek tur thu hi twitter lamah a pholang a, an inhnek hun leh hmun tur awmna video pholangin 'A chiang ta' tih inziak nen twitter-ah a pho chhuak. UFC lightweight champion McGregor pawhin an inhnek tur hi tihchian a nih thu pholangin 'Inhmachhawn hun a thleng dawn ta' tih chu twitter-ah a pholang.

Hausak ren rual loh
Boxer pahnih inhnekna tur hmun hi T-Mobile Arena, Las Vegas a ni a, boxing-a an tih ṭhin dan angin round 12 thleng khelh tur a ni dawn. Heti taka ngaihven inhnekah hian fighter pahnih hi a maktaduai telin an hausak belh dawn a, pound maktaduai 78.4 ve ve insem thei tura ngaih an ni - boxing infiam­naa sum tamna ber tur a ni ang.

Las Vegas khawpuia inhnek tur hi American pay-per-view record thar ni thei tura beisei a ni bawk. May 2015-a Mayweather-a'n Filipino boxer Manny Pacquiao a hmachhawn khan pay-per-view kaltlangin mi maktaduai 4.6-in an en a, he record hi McGregor nena an inhnek tur hian a khum beisei a ni.

Inbiakna chu
MCGregor aiawha inbiakna kalpuitu UFC president Dana White chuan, "Hun engemaw chen chu Mayweather Promo­tions nen hian kan indawr tawh a, ruahman angin engkim a kal a ni ber. Mayweather hian mi ṭha tak tak a thawhpui a, tunah chuan tih theih loh nia ngaih kha kan ti ta. Vawiina McGregor-a'n tun dinhmun a thlen chhan chu a huaisen em em a, a hmaa ding tupawh huai takin a bei mai zel. Floyd Mayweather pawh hi huai takin a bei ang a, knockout ngei a tum ang," a ti.

Mayweather Promotions chief executive Leonard Eller­be chuan, "Floyd nena kan kalna hmun apiangah Mc­Gregor chungchang zawh a nih lohna hmun hi ka hre lo. Khawihah pawh kal ila, "Floyd, Conor McGregor i hmachhawn dawn em?" tih zawhna hi a dawng reng a, Floyd pawh hian McGregor hnek ngei hi a duh a ni," tiin a sawi.

McGregor ringtu White
Boxing weight division pa­nga­ah Mayweather hi world champion a ni tawh a, kum 2015 khan inhnek vawi 49-a hma­chhawna tlawm hmel a hmuh loh hnuin inhnek a chawlhsan. Mc­Gregor erawh November 2016 khan UFC-a division pa­hnih champion hmasa ber ni mah se boxing-ah kher chuan tawnhriat la nei lo a ni a, a boxing licence hi California State Athletic Commission hnen aṭangin De­cember-ah khan a nei ve chauh.

Boxing ring chhunga figh­ter pahnih tawnhriat ngah tawhna aṭanga thlirin McGregor-a'n ringtu a nei tlem a, mahse UFC lama amah hrechiangtu White chuan a ringtawk hle. UFC president chuan, "Floyd May­weather hi kum 40-a upa a ni tawh a, southpaw-ah a buai ziah bawk. Conor McGregor hi kum 28-a upa chauh a la ni a, Southpaw chhawr ṭangkai ṭhintu a ni. McGregor-a'n mi a hnek fuh chuan tumahin an dawl zo ngai lo a, an tlu mai ṭhin. McGregor hian 100%-in a chak dawn tih a chiang a, hun rei tak aṭang khan kei pawhin chu chu ka lo rin pui tawh," a ti.

McGregor hian MMA-ah match 24 a hmachhawn tawh a, vawi 21 hnehna changin vawi thum a tlawm.