Semifinal khel tur chiang dawn

CYMA leh MFA ṭang­kawpin an buatsaih TṬ Royte Trophy-ah Ram­hlun South, College Veng leh Chanmari ten semifinal an lut tawh a, tukin zing dar 7:00 hian hmunruak pakhat tihchian a ni dawn. RG Stadium, Mualpuiah Chhinga Veng leh Salem Veng te an inkhel ang.

Team pahnih hi rua­hmanna hmasaah chuan June 12, Thawhṭannia inkhel tur kha an ni a, ruahsur leh chhum zin vangin khelh theih a ni lo. Hemi ṭum hian team en­kawltuten starting eleven an puan hman vek avangin tukin inkhel tur atan pawh awmze neiin an inzir lawk thei dawn tihna a ni.

Inkhelhna hmun tur RG Stadium hi Salem Veng aṭanga kea kal phak lek a nih avangin ṭantu an ngah dawn a, veng lian Chhinga Veng pawh ṭantu lamah an ṭan a ṭul ang.

NECS Cup champion Chhinga Vengin chak an tum tih nemngheh nan Aizawl Venglai an hneh ṭuma player pawimawh S. Malsawmtluanga chu inkhel bul ṭan tur zing­ah an dah tawh. Mizo­ramin football-a hma a sawn theih nana khel­muala thawh hlawk Mama hian amah chauh chuan engmah a ti thei dawn lo a, player ṭha dang Lalkhawpuimawia, Rochhar­zela, K. Lalthlah­lova leh Lalchhuanpuia ten an thlawp ṭhat a pawimawh dawn.

Salem Veng lamah an player pawimawh Joseph Lalnunpuia a dam tawh a, talent nei ṭha R. Lalṭhapuia, Israel Lal­dingngheta leh David Lalchhuanawma te an awm bawk avangin coach Jerry Zoremmawia hote hi dah hniam theih an ni lo.

Quarterfinal - RG Stadium
Vawiin Inkhel Tur - QF2
7:00 AM Chhinga Veng Vs Salem Veng
Semifinal
1st leg : June 19, Thawhṭanni
11:00 AM Ramhlun South Vs Win of QF2
01:30 PM College Veng Vs Chanmari
2nd leg : June 21, Nilaini
11:00 AM Chanmari Vs College Veng
01:30 PM Win of QF2 Vs Ramhlun South
Final - June 23, Zirtawpni