Ramhlun hnehtu Hunthar an tlang

GIG Motors Pro Volleyball League final khel tur a chiang ta. Nilaini zan semifinal-ah Hunthar Veng chuan Ramhlun Sporting Club 3-1 a hnehin final an lut, June 20 zanah Chhinga Veng nen final an khel ang.

R. Dengṭhuama Indoor Stadium, Mualpuia inkhelah Hunthar hian 25-17, 23-25, 25-16, 25-21 in hnehna an chang. RSC an hneh theih nana point 21 hlawh chhuaktu Sarang S Lal chu LG D3 Player of the Night atan thlan a ni a, Santhosh Kodakkal-a'n point 24 vaw chhuak in player langsar a ni mah se tihsual vawi riat a nei thung.

Hmeichhe Final

Zanin dar 8:00 hian Power Depart­ment Sporting Club leh Electric Veng ten hmeichhe final an khel dawn. A chak zawk hi PVL hmeichhe inelnaa champion hmasa ber an ni ang.

Kuminah hian hmeichhe team thum an tel a, vawi khat ṭheuh an inkhelh kual hnuah a sang pahnihin final an lut. Power SC hian league round lamah Electric Veng hi 25-18, 17-25, 25-19, 22-25, 21-19 in an hneh tawh, hnehna chang mah se inchhuang tur an la awm lo - inkhel inhnehtawk takah a vannei zawk an ni, zaninah an inbei tawk leh khawp ang.

Hmeichhe champion hian Rs 50,000 an dawng ang a, pahnihnain Rs 30,000 dawngin pathumna Durtlang hnenah Rs 10,000 hlan an ni dawn bawk.