Vawiinah Gopichand a rawn thleng dawn ; Badminton-ah Mizo tan beisei tur a awm - Rajendra

Indian badminton team-a chief national coach Pullela Gopichand chuan vawiin hian Tata Trusts Sub-Junior Badminton Talent Search final chhim turin Aizawl a rawn thleng ang.

Badminton-a Mizote talent hai­chhuahna tura inelna hi Nilaini aṭang khan Saron Indoor Stadium-ah neih ṭan a ni a, inelna hi Mizoram Bad­minton Association-in Tata Trusts leh Gopichand Badminton Academy te nen ṭangkawpa an buatsaih a ni.

India rama badminton academy langsar ber hian inelna ṭantirh aṭanga Mizo naupang zirchiang turin head coach Rajendra Kumar leh Premier Badminton League club Hyderabad Hunters neitu zinga mi P. Srikanth te Nilaini khan Aizawl rawn thlengin an thlen tlaiah an hna an thawk ṭan nghal.

A inzir theih

Gopichand Academy head coach Rajendra chuan, "Mizote badminton-ah thui tak an thlen theih kan beisei vangin kan rawn kal a ni. Nikum khan Manipur player-in an rawn zawm a, an rawn awm tirh chuan India ram inelnaah qualifier an khel a, an awm hnuah chuan national-ah junior-ah an champion a ni," tiin Vanglaini a hrilh.

Kum 2013-ah khawvel badmin­ton inelnaa sum tamna ber IBL ṭan a nih a, Hyderabad Hotshots cham­pion puitu head coach Rajendra chuan, "Player ṭha ni tur chuan chet ran, chak leh rilru put hmang dik te a pawimawh a. Chutihrualin kum 15 an tlin hma chuan an theihna tak tak a la hriat theih loh a, engmah a la sawi lawk theih loh. Tun hma chuan Indian hian fitness-ah ram dang kan tluk lo a, tunah chuan kan hnaih chho hret hret a ni," tiin India-in badminton-a hma a sawn chhoh thu a sawi.

India rama hmeichhe shuttler lar Saina Nehwal, P. V. Sindhu leh Arundhati Pantawane bakah mipa shuttler ṭha Srikanth Kidambi, Parupalli Kashyap leh Prannoy Kumar te hi Gopichand Academy chhuak an ni a, Rajendra hi India ramin badminton-a hma a sawn chhoh dan hrechiang ber zinga mi a ni.

Rajendra chuan, "Srikanth hian kan academy a zawm hmain badminton khelh chawlhsan a tum hman a, amaherawhchu theihna a nei tih kan hmuh avangin kan sawm a, a hlawh tling ta. Kum 15 a nihin kan academy a zawm a, hemi hma chuan ani pawh hi national-a inel pha tur pawhin qualifier a khelh a

ṭul ṭhin. Saina leh Sindhu pawh hi an naupan lai chuan hetiang dinhmun an thlen theih kan beisei ngam bik lo a, Sindhu hi a naupan lai chuan a rualpui ho aiin a lian bik lo. Tunah chuan Sindhu hi feet 5 leh inches 11 a ni a, Olympic-a India ram tana silver a la thei hmasa ber a ni a, Saina pawh badminton-a Indian zinga Olympic medal la hmasa ber a ni," tiin a enkawl chhuah te chiang takin a sawi.

Mizo tan hmun ruak?

Hyderabad-a inkulh Gopichand Academy-ah hian mi 150 bawr vel an inzir mek a, North East aṭangin panga an awm. Academy-ah hian player-te hi kum bithliahin category paliah ṭhendarh an ni a, chungte chu 8-13, 13-16, 16-19 leh senior te an ni.

Rajendra chuan, "Kan acade­my-a lut tur hian a hranpain trial kan ko ngai lo a, inelna kan thlir

aṭangin kan thlang ṭhin. Trial kan koh chuan tunah pawh luh dilna 5000 bawr vel kan dawng a, kan enkawl seng lo a ni," tiin player nazawng an lak loh thu a sawi.

Mizo tan hmunruak a awm em tih zawhna chu Rajendra chuan, "Kan lak tur zat kan sawi thei lo a, amaherawhchu player ṭha kan hmuh phawt chuan kan la dawn," tiin Vanglaini a hrilh.

Gopichand hoin

Tata Trusts Sub-Junior Bad­min­ton Talent Search final hi India ram badminton tana thawh hlawk bera sawi ngam Gopichand-a'n a rawn thlir dawn a, Rajendra leh P. Srikanth te zirchian tawh player rawn thlir nawnin thutlukna a rawn siam ang.

Vawiin tlai dar 5:00 hian final khelh ṭan a ni dawn a, Gopichand rawn kal hi Mizoram Badminton Association tan chanchin chhin­chhiah tlak a ni.

MVA president C. Zorammuana chuan, "Gopichand Academy leh Tata Trusts nena kan thawhhona tura hma min lakpui tute zawng zawng chungah lawmthu kan sawi a. A bik takin kan chief minis­ter zahawm tak leh kan sports minister-in min phurpui a. A ṭul ang senso zawng zawng Sports Council ten min tumsak a, a tir aṭanga hma min laksaktu kan DC chungah kan lawm takzet bawk a ni," tiin Mizoram badminton-in hma an sawn theih nan puihna an hmuh ṭhat thu a sawi.