ISL-I League-in politics rim a nam!
I League leh Indian Super League (ISL) inhruipawhin politics rim a nam ṭan ta!
Season thar aṭanga Indian Super League khel turin Bengaluru FC leh Tata Group lakluh an ni tawh a, East Bengal leh Mohun Bagan-in ngawi renga thlir liam mai an tum lo - sorkar laipuia roreltu Bharatiya Janata Party (BJP) puihna an ngen riap mai!
Football Sports Development Limited (FSDL)-in ISL khel duh tan hmun ruak pahnih a awm thu an puan khan khawpui 10 thlan chhuah zingah Atletico de Kolkata an awm tawh chungin Kolkata khawpui thlan tel a ni.
Bengaluru FC leh Tata Group-in dilna an thehlut a, Kolkata club pahnihin tlai khawhnuah documents pawimawhte la chhuak ve bawk mah se dilna erawh an theh lut lo - ISL club tharah telh an ni lo.
Sum aiah ropuina
ISL-a khelh tumin FSDL hnenah franchise fee vaibelchhe 15 pek a ngai a, he thuah hian ISL hotute leh Kolkata club lian pahnihte thu a inhmu thei lo.
East Bengal leh Mohun Bagan-in an sulhnu leh ropuina hmachhuanin India rama league sang ber khel tura sum pek an tum lo a, ISL lam hotuten club dang zawng 'fee' an chawitir laia Kolkata club pahnih awltir bik an duh lo.
ISL leh Kolkata club pahnih thu a inhmuh loh miau avangin East Bengal leh Bagan-in dilna an thehlut ta lo a, ISL an khel dawn lo tih a chiang nghal bawk.
Mahse, I League vawi hnih champion Bengaluru-in pawisa tam tak senga ISL lam pan an thlan avangin I League hi a hlu lo zawk tih a lang chiang ta reng a, club ropui inti tan ram pakhata league pahnih zinga ngaihhlut loh zawka khelh hi lungawi taka pawm harsa lai chu a ni.
Hello Didi
East Bengal leh Mohun Bagan-ten ISL-ah an khel dawn lo tih a chian hma daih tawh khan AIFF nen an thu a inhmuh theih loh avangin West Bengal chief minister Mamata Banerjee chu anmahni ṭanpui turin an lo dawr daih tawh a, amah ngaisangtuten 'Didi' tia an koh chief minister hian club pahnih hlutzia hriain puih a lo tiam tawh.
Mamata Banerjee hian, "East Bengal leh Mohun Bagan tel lo chuan West Bengal-ah ISL khelh a ni lo ang," tih hi a thuchhuah hmasa chu a ni a, Atletico de Kolkata tan hahdam theih a ni lo.
West Bengal chief minister Mamata Banerjee hi infiamna ngaina tak, a bik takin football lama ṭhalaite hmakhua ngaitu a ni. June 20-ah hian football thiam vanga ram lar Netherlands football enkalwtu Royal Dutch Football Association (KNVB) chu thawhhona thuthlung ziahpui turin a be fel tawh a, heti taka football ngainatu hian East Bengal leh Mohun Bagan hi a dinpui reng a nih pawhin a mak lo ang.
Welcome BJP
East Bengal leh Mohun Bagan-in state sorkar puihna an duhtawk mai lo a, sorkar laipuia roreltu Bharatiya Janata Party (BJP) puihna an ngen - BJP national general secretary Kailash Vijayvargiya chuan Kolkata club lian pahnih hi puih ngei a tiam a, Sports Ministry-te nen an thawhho theih dan tur a ngaihtuahpui dawn - East Bengal leh Mohun Bagan-in Kolkata khawpuia fans (vote?)an ngahzia an hai lo.
BJP national secretary Vijayvargiya chuan, "India mai ni lo, international football thlenga kum 100 chuanga upa club-ten in thawhhlawk zia hi ka hria a, puih theihna che u ka nei a nih chuan ka lawm khawp ang. Dawhkan kila, sawiho duh in nei a nih pawhin kan inpeih reng a, ministry of youth and sports nena inkawm in duh a nih pawhin ruahmanna kan siam mai dawn a ni," tiin Kolkata club pahnih hnenah lehkha a thawn a, ISL leh I League boruak a la ngaihnawm chho dawn chauh niin a lang.