England barakhaihtu Pakistan-in final an lut
ICC Champions Trophy-ah beisei loh result a thleng - Nilaini tlai khan Pakistan chuan chak tura rin hlawh zawk England chu Champions Trophy semifinal-ah wicket riatin an hneh a, final an inhlangkai.
Shaheens tan run 76 vaw chhuaktu Azhar Ali a langsar a, wicket thum laa England batsman-te chhaih mangangtu Hasan Ali lam hmaih theih a ni lo bawk - kum 23 leka upa pace bowler hian tun tournament-ah wicket 10 a la tawh a, amah hnaih bertu Josh Hazlewood-a'n ( 9 wkt) semifinal-ah Australia a hruai thleng zo lo.
England an tlu
England leh Wales-in Champions Trophy an inthlen ṭawm a, mahni muala inlan an nih avangin England hi champion tura beiseina a sang hle. Group match-ah pawh England-in an theihna pholangin match thumah hnehna an chang vek - semifinal lut tur hian Bangladesh, New Zealand leh Australia an sawp.
Pakistan erawh an match hmasa berah India hneh loin an mualpho a, South Africa leh Sri Lanka an hneh chhunzawm thung avangin semifinal an lut. Pakistan hian an match hnuhnung pahnihah hnehna chang mah se England meuh hneh tur erawhin beisei an ni lo a, thilmak an thlentir.
Pakistan harhna
Cardiff khawpuia inkhelah England an bat hmasa zawk a, over 5.5-ah run 34 an siam tihin wicket an hloh nghal - Alex Hales chu run 14 chiah a siam hman tihin a out. Hales nena ding dun Jonny Bairstow chu over 16.3-ah a out zui a, run 43 a tlin hman. Bairstow out hnuah Joe Root chuan run 46 vaw chhuak ve leh mah se Pakistani bowler hmaah English bastman-te an che hleithei lo a, over 49.5-ah run 211 chiah siamin an out vek.
Pakistan tan Hasan Ali chuan a vawm ṭha takzet a, over 10-a vawmah run 35 chiah pein wicket thum a la thei. Ali-a'n puitu a nei ṭha bawk - Junaid Khan leh Rumman Raees-ten wicket hnih ve ve an la bawk a, England batsman an zawr.
Hei le Pakistan
Pakistan bat hun a thleng a, England bowler-ten Shaheens batsman-te an ngam lo - opener Azhar Ali chuan run 76 zet a rawn vaw chhuak nghal a, a dinpui Fakhar Zaman chuan run 57 zet a siam bawk. Pakistan-in an wicket hmasa ber an hloh hian over 21.1 a ni tawh a, run 118 an tlin tawh - chak tur a chiang tawha ngaih a ni.
England-in Zaman leh Azhar an vawm out hnuah wicket dang an lak belh tawh lo a, Pakistan tan Babar Azam (38 runs) leh Mohammad Hafeez (31) te an rawn chet ṭhat zui bawk avangin England-in tih theih an nei tlem hle. Pakistan-in over 37.1-ah an target an umpha fel der tawh a, wicket hnih chiah hlohin hnehna an chang.
Eng nge an sawi?
England captain Eoin Morgan chuan, "Ṭha taka kan khelh hnua Pakistan laka kan chet dan hi hriatthiam a harsa a ni. Hneh loh tawng la semifinal lut awmchhun kan ni a, kan awmna group lah a harsa em em. Chung zawng zawng ngaihtuah erawh chuan lawmna tur awmin ka hria a, hmasawnna hmuh turin a awm a ni," a ti a, a eng zawngin a thlir.
Pakistan captain Sarfraz Ahmed chuan, "Kan bowler leh batsman ten fak an phu a ni. Kan team khelh tur a zirin kan inthlak danglam thiam a, bowling lamah kan tih ṭhat phawt chuan battting lamah buaina tur a awm lo tih kan hria a ni. Vawi khat chak loha petchhuah mai theih kan nih avangin ka naute hnenah result ngaihtuah loa theihtawp chhuah turin ka hrilh a ni," tiin a naute chu hlauhna nei loa khel tura a fuih thu a sawi.
Hmabak
Pathianni tlai dar 3:00-ah Champions Trophy final khelh a ni nghal dawn. Nimin tlai khan semifinal dangah India leh Bangladesh an inhmachhawn a, result kan hre hman lo.
England-in ICC Champions Trophy-ah beisei tur nei tawh lo mah se chawl hman erawh an ni lo. Karleh khian South Africa nen Twenty20 series an khel lehnghal dawn a ni.