HPC Cup Final-ah Electric Veng vs Rahsiveng

Vawiin chawhnu dar 1:30 hian HPC Cup vawi sarihna final khelh a ni dawn a, Ṭhuamluaia mualah champion lai Electric Veng leh Rahsiveng an inhmachhawn ang.

Lunglei District FA buatsaih in­el­naah hian Electric Veng hi vawi thum an champion tawh a, HPC Cup bakah hian Inter Branch YMA Football Tournament nomawi kawltu an nih avangin rinkai zawk an ni.

Electric Veng hian semifinal-ah C. Lalduhawma goal hnih hmangin Pukpui an hneh a, goal khung kawngah harsatna an nei lo tura ngaih a ni. India junior team-a tel tawh ṭhin Lalduhawma bakah hian midfielder hmuhnawm Lalrinchhana leh Hmangaihsanga te an nei bawk.

An tlarhma piah lamah Electric Veng chakna hnar pawimawh erawh an goal an venghim ṭha ṭhin hi a ni, tlarhnungah MPL5-a best defender Lalhlima an nei, inrin­tawkna an nei sang khawp ang.

Rahsiveng hian sulhnu lian sawi tur an ngah lo, chutihrualin tual­chhung foorball-ah a hnufual pawl an ni ngai bik lo. Kuminah 'Rahsiveng ka ni tlat' ti ṭhinte hi last 16 pel tura tlang rinkai an ni phak lo. Mahse, inkhel thunun lo leh ball chang tlem zawk ni ṭhin chungin final an inpet kai thei - vawiin an hmachhuan tur pawh huaisenna a ni.

Rahsiveng innghahna lian ber pakhat chu an captain Remruat­thanga a ni leh dawn a, forward Ramdinmawia khelh ṭhat leh ṭhat loin an chak leh chak loh a hril thui bawk ang, midfielder Daniel Lalnunpuia pawh player en bik tur zinga mi a ni ang.