United defender thar Lindelof chu...

Manchester United-in Victor Lindelof chu an club history-a de­fender manto ber ni turin Nilaini khan Benfica aṭangin an lalut a, Swede defender man zat hi pound maktaduai 31 a ni.

United-in kum 2002 khan Leeds United aṭangin Rio Ferdi­nand chu pound maktaduai 29.1 in an lalut a, Red Devils tana Eng­lish defender record hi kum 22 mi Lindelof hian a rawn khum ta a ni.

Sweden tana vawi 12 inlan tawh defender hian kum li chhung atan contract a ziak a, kum khat dang pawhsei theih dan a awm bawk. Lindelof hian July thlaa USA-a an tour hunah United tan a inlan ṭan ang.

Mourinho hmuh dan

United manager Jose Mourin­ho chuan, "Theihna sang tak nei a ni a, United-ah hian hmabak êng tak a nei a ni," tiin an player thar Lindelof a fak.

Portuguese manager chuan sawi chhun­zawmin, "Season liam ta aṭang khan player thlan theih tur ka mamawh tih a chiang a, squad kan tihchhah a ṭul a ni. Victor hi tun nipuia kan player hmasa ber a ni a, player awm tawhsa ten lawm takin an pawm ngei ang," tiin a sawi.

Tu nge Lindelof?

Victor Lindelof hian pressure sang takah pawh dam dupa a khelh theih avangin fak a hlawh.

June 30, 2015 khan Sweden-in UEFA European Under-21 Championship final-ah Portugal an hmachhawn a, hun pangngaiah goal a lut lo. Penalty shootout-ah Sweden tana a vawi lina pettu Abdul Khalili-a'n a hlah a, Portugal tan Joao Mario-a'n a khung leh chiah avangin 3-3 a ni.

A vawi nganaah Lindelof-a'n rawn petin cool takin a pet goal a, Portugal chhuanvawr William Carvalho-a'n a hlah avangin Sweden an champion. Lindelof hi Sweden-in a tirah squad-ah a ko lo a, a hnuah squad-ah ko leh hnuhnawh mah se right back-ah ṭha taka a khelh avangin team of the tournament-ah thlan tel a ni.

Euro U21 an champion hian Lindelof hi Benfica-ah a awm tawh a, Portuguese club hian kum 2012 khan Vasteras SK aṭangin an lalut a. Benfica hian Sweden tana Under 16 leh Under 17 team tana a khel an hmuh aṭangin an club-a khel tlak tih an hmu a, Lindelof hian kum 16 leka upa a nihin an ram club Vasteras tan a khel pha tawh hrim hrim bawk.

Euro 2016-ah Sweden-in group stage paltlang thei lo mah se Lindelof hi match thumah a inlan vek a, amaherawhchu Benfica-in nikum khan Middlesbrough lama loan-a chhuah an tum hman a, thutlukna an sut hnuah Portuguese club tana player pawimawh berte zinga mi a ni. Lindelof hian season hman zawh takah khan Benfica hi an league Primeira Liga leh cup Taca de Portugal-ah a champion pui a ni.

Lindelof thukhawchang

Sweden defender Lindelof hian Benfica tan Champions League-ah tawnhriat a nei tawh a, Jose Mourinho hnuaia khelh theihna hun remchang a neih chu lawmawm a tih thu a sawi.

Lindelof chuan, "Jose nen kan inbe tawh a, ka bula thu a sawi te kha ka tana pawimawh chu a ni. A hnuaia khel tura min duh avangin ka lawm a hmasawn zel ka duh vangin United hi ka pan a ni," tiin Portuguese manager-in a thlem chhuah thu a sawi.

United defender thar chuan Eric Bailly, Marcos Rojo, Chris Smalling, Phil Jones leh Daley Blind te nen hmun inchuh tura a inpeih thu a sawi a; defensive midfield leh right back-ah khel thei mah se central defender chu a nuam tihna ber a nih thu a sawi.

Swede defender Lindelof chuan Man­chester chungchangah Sweden player ropui ber Zlatan Ibrahimovic nen an la inbiak loh thu a sawi a, club tana theihtawp a chhuah tur thu a sawi lang bawk.

Lindelof chanchin tawi
Pian ni : July 17, 1994 - Vasteras, Sweden
Kum : 22
San zawng : 6ft 2in
Position : Centre back / Right back
Club record
2010-2012 : Vasteras (Pld - 41; 0 goals)
2012-2016 : Benfica B (Pld - 96; 4 goals)
2013-2017 : Benfica (Pld - 73; 2 goals)
2017- : Manchester United
International record
2016 - : Sweden (Pld - 12; 1 goal)