Premier League manager-te dinhmun a nghet lo?
Jose Mourinho-a'n Premier League nomawi a chawi hnuah Chelsea-in an ban a, Claudio Ranieri pawh hlawhtlinna a chan hnu season khat a liam hmain Leicester City chuan an ban bawk. English football inelna sang berah manager dinhmun him an awm lo tia sawi theih a ni.
Kum 2015-16 season khan Premier League manager 12 zet ban an ni a, tun hnaia Southampton-in Claude Puel an ban nen khan season liam ta chhunga manager ban zat chu pasarih an ni - season hmasa zawk aiin pangain a tlahniam.
August 12 aṭangin Premier League khelh ṭan a ni leh dawn a, tun dinhmunah club 20 zingah Saints leh Crystal Palace ten manager chhawr lai an nei rih lo. Manager dang 18 te erawh tun nipui chhunga chhuak tur langsar an awm rih loa ngaih a ni.
England-a football inelna sang berah hian English manager an hlawhtling khat ta hle. Howard Wilkinson-a'n kum 1992 khan Leeds United chu nomawi a chawipui a, ani hnuah tualchhung manager zingah league champion thei an la awm lo. Season hmasa khan Tony Pulis chuan West Brom chu 10-na a nihpui, English manager zinga thleng sang ber a ni.
A rei ber chu
EPL manager ṭanglai zinga hna ngai chelh rei ber chu Arsene Wenger a ni. French manager hian kum 20 leh ni 256 chhung zet Arsenal a enkawl tawh. Wenger hian league nomawi vawi thum a chawi tawh a, beisei leh duhthusam ang result a neih reng bik loh avangin bang tura nawrna pawh a nasa ṭhin hle.
Mahse, Gunners hian an club leh player training dan kalphung thlak danglam a, stadium lian zawk sak puitu leh club lian ngelnghet taka chherchhuaktu hi an la ban phal mai lo, season hnih dang contract a ziak leh tawh.
Kum 67-a upa Wenger tih lohah chuan Bournemouth manager Eddie Howe hi hna ngai chelh rei ber a ni. Howe-a'n 2012 aṭangin Bournemouth a enkawl ṭan a, season hmasa khan Premier League-ah inhlankai puiin pakuana a nih pui hial - season tharah a hna ngai a chelh zel ang.
A nghet lo
Antonio Conte-a'n a season khatnaah Chelsea a hlawhtlinpui nghal a, Italian manager hian Champions League a khelhpui dawn bawk avangin tun dinhmunah chuan khawih chet thiang lo a ni.
Amaherawhchu, Blues hi khawvela manager langsar - Jose Mourinho, Carlo Ancelotti leh Luiz Felipe Scolari te nen pawha inṭhen tawh an ni. Tun hnai kum sarih chhunga manager pariat nei thei club an ni tih erawh kan hriat reng a pawimawh.
Liverpool-in Dortmund manager hlui Jurgen Klopp an lakluh aṭangin kum khat leh ni 249 a liam tawh a, a season hmasa zawkah an duh ang thleng lo mah se season tharah Champions League an khel dawn.
Nomawi duha tuihal Reds hian tun hma lama an ropuina ang kha neih let an duh a, German manager lakah beisei an nei sang hle. Chutihrualin league-ah palina an ni nawn a nih chuan an lungawi zanin a rinawm loh, hmasawnna tur an nei.
Club lian dangte ang bawka sum hmang hnem Manchester United hi league-ah parukna ni mah se Europa League leh League Cup-a an champion avangin Mourinho dinhmun a nghing lo. Mahse, a sang pali zinga tel lo chunga season a khar nawn chuan a him nawm bik lo tawp ang.
Saints leh Crystal Palace ten manager thar hmangin season bul an ṭan dawn a, anni bakah hian Watford pawh manager thar Marco Silva kaihhruai tur an ni; Craig Shakespeare-a'n a nghetin a naute a enkawl chhunzawm bawk ang.