Huddersfield player manto ber Mooy

Premier League kai thar Huddersfield Town-in an player manto ber ni turin Manchester City midfielder Aaron Mooy chu pound maktaduai 10-in an la nghet.

Australia international kum 26 mi Mooy hian season liam ta khan loan-in Yorkshire club tan a khel a, coach David Wagner-a hnuaia Premier League an khelh theih nan player pawimawh a ni.

Huddersfield Town hian Mooy la nghet tur hian pound maktaduai 8 an pe phawt ang a, maktaduai hnih dang belh theih dan a awm. City hian contract-ah player lak let theih dan an ziak tel a, Huddersfield hian an hralh a nih pawhin hlawkna an chan leh theih dan a awm bawk.

Thla 12 liam ta khan Mooy hian Melbourne City aṭangin Manchester City a zawm a, Hudders­field-ah loan-in a chhuak nghal. Championship-ah Mooy hian match 46 khelh tur awmah match khat chiah a awl a, goal li a khung.