Champions Trophy ; India-in final an lut
ICC Champions Trophy champion lai India chuan an nomawi humhim turin match khat chiah hmabak an nei ta - Ningani tlai khan Bangladesh chu semifinal-ah wicket kua ngawtin an sawp a, hmelma kumhlun Pakistan nen Pathianni tlai dar 3:00-ah final an khel dawn.
Edgbaston-a inkhelah India tan Rohit Sharma chu a 'changtupa' a ni a, Indian Premier League-a Mumbai Indians captain hian run 123 ngawt a vaw chhuak. India hmaah dawl zawrin Bangladesh an zawr a, over 9.5 khelh tur a la awm tihin India-in hnehna an chang fel der.
Tiger an zawr!
Bangladesh-in 'The Tiger' tiin hminglem an inpe a, India hmaah erawh zawhte, darthlalanga in en a, 'sakei hmuha inhmu' ang lek an ni! Bangladesh an bat hmasa zawk a, opener Tamim Iqbal chuan run 70 a rawn siam nghal avangin an dinhmun a ṭha dawn hle niin a lang hman - run 152 an siamin wicket hnih chiah an hloh.
Mahse, Indian bowler Kedar Jadhav-a'n Tamim a vawm out hnuah run 61 siamtu Mushfiqur Rahim bak Bangladesh batsman zingah che hleithei an awm lo a, over 50-ah run 264 chiah siamin wicket sarih an hloh - India batting line-up ngaihtuahin mitthlaah Pakistan leh India final lai a lang nghal!
Rohit a 'hit'
India bat hun a thleng a, tun tournament-a che ṭha tak Shikhar Dhawan chu run 46 a siam tihin a out - mah se over 14.4-naa an wicket lak lawma an au bak hi Bangladesh player-te an au nawn tawh lo! Opener Rohit Sharma chuan ball 129 a hmachhawnah run 123 ngawt a vaw chhuak a, Edgbaston-a Bangladesh fan-te an hawihai.
Virat Kohli hming lam hmaih theih a ni lo. Inkhelh ṭan hmaa Bangladesh media lamin thlalak siamchawp thehdarha fiamthu thawh nana an hman batsman hian Bangladesh fan-te ṭahna a thlen a, ball 78-ah run 96 siamin a tawp thleng a dam ve bawk. India-in over 40.1-ah run 265 an vaw chhuak a, wicket khat chiah hlohin hnehna an chang.
Pakistan hmaah India
India-in final an lut a, an hmachhawn tur chu England hneha final lut Pakistan a ni. Ram pahnih hi cricket-ah an inhmachhawn tawh chuan khawvel huapa team pahnih inhmachhawna ngaihven hlawh pawl a ni nghal zel thei a, Pathianni tlai inkhel tur pawh hi a danglam tam lo.
Ram pahnih inkar politics avangin India leh Pakistan hian 2007 hnuah test match an khel dun leh tawh lo a, ODI/T20 series-ah pawh 201-13 hnuah an inhmachhawn leh tawh lo. Tun hnaia ram pahnih inhmachhawnna chu ICC hnuaia tournament a nih loh chuan Asia Cup a ni tlawng mai - Champions Trophy final-ah ram pahnih an intum dawn a, khawvelin nghakhlel takin a thlir.
Kohli a fimkhur
India-in group stage-ah Pakistan hi run 124-in an sawp tawh a, final-ah pawh chak tura rinkai zawk an ni - mah se Pakistan hian India an ngam loh hnuah South Africa, Sri Lanka leh England hnehin final an lut a, dah hniam theih an ni tawh lo. India captain Virat Kohli pawh a ṭawng fimkhur hle.
Kum 28-a upa batsman chuan, "Pakistan hian team ṭha zawk nia ngaih pawh an hneh zel thei a, an team thawhhona a ṭha em em a ni. Final-a kan tum tur chu tupawh nise kan tan chuan chona phurawm tak a ni vek a, kan final kalkawnga ṭha taka kan khelh angin khelh kan tum dawn a ni," a ti.
India batting line-up ṭhat zia sawi a ni ṭhin a, Pakistan bowler-te hi tun inelnaa wicket la hnem ber (31) an ni thung - Pakistan hnuaiah hian wicket 29 latu India an awm bawk. A khaikhawmna awlsam ber chu Pathianni tlai inkhel a hmuhnawm dawn, tih hi a ni.