Kylian Mbappe duhtu Madrid-in Monaco dawr
French champion AS Monaco-in an rawlthar duhawm Kylian Mbappe hralh tumna an neih loh thu sawi ṭhin mah se French rawlthar duhawm chungchangah Real Madrid nen indawrna an kalpui mek niin khawthlang media te chuan an tarlang leh ta.
Club pahnih hian kar hmasa khan indawrna an lo kalpui tawh a, Monaco hian kum 18-a upa striker hi hralh duh lo mah se an chhiarna ang zata Madrid-in an lei ngam a nih chuan kal tir mai an pawi ti lo niin an sawi. Ligue 1 champion hian Mbappe manah hian pound maktaduai 118 an duh nia sawi a ni a, Real hian heti zat sum thehchhuah an inhuam a nih chuan Mbappe hian khawvela player manto ber Paul Pogba man a khum dawn tihna a ni.
Real Madrid hian Alvaro Morata leh James Rodriguez hralhna aṭangin pound maktaduai 100 chuang hmuh an inbeisei nia sawi a ni bawk a, player pahnih hi an hralh a nih chuan Mbappe leina tur pawisaah chuan buaina an nei dawn lo tihna a ni. France tana vawi li inlan tawh Mbappe hian season hman zawh takah khan Monaco tan match 44 khelin goal 26 a khung a, Paris Saint-Germain leh Manchester City pawhin lakluh tumin an hel mek nia sawi a awm bawk.