Semifinal-ah NECS Cup champion Chhinga Veng
CYMA leh MFA ṭangkawpin an buatsaih TṬ Royte Trophy - Inter Branch YMA Football Tournament-ah a thiam pali a hriat kim ta. Nimin zing khan Chhinga Vengin RG Stadium-ah Salem Veng 5-0 in an sawp.
CYMA Football semifinal hi double leg-a khelh tur a ni a, first leg hi June 19, Thawh-
ṭanni khian Lammualah khelh tur a ni. Chawhma dar 11:00-ah Chhinga Veng leh Ramhlun South an inkhel ang a, chawhnu dar 1:30-ah College Veng leh Chanmari an inhmachhawn chhunzawm ang. Second leg hi June 21, Nilainiah khelh tur niin June 23, Zirtawpniah final khelh a ni ang.
5 Star Chhinga Veng
RG Stadium-ah Salem Veng mipui an fuankhawm a, Chhinga Veng lakah hnehna chan an tum. Coach Jerry Zoremmawia hoten inkhel bul an ṭan ṭha a, amaherawhchu S. Malsawmtluanga telna Chhinga Veng insiamrem hnuah ṭantu ngah Salem Veng tan dan rual an ni lo.
Chhinga Vengin inkhel an thununna chu goal hmangin an lantir a, Lalkhawpuimawia (Mapuia) leh Rochharzela ten first half-ah goal khat ve ve an khung. Goal hnih luh theih nan hian Chhinga Veng tlangval Isaac Lalremruata a thawh hlawk hle. Salem Veng lamin penalty shout an nei a, pek an nih loh avangin halftime-ah 2-0 a ni.
Second half-ah pawh Chhinga Veng bawk an chungnung a, amaherawhchu insum theih loh vangin Lalchhuanpuia chu hnawhchhuah a ni a, Chhinga Veng midfielder thinrimnaa mawhphurtu David Lalchhuanawma a him hlauh thung.
Salem Veng tan hun ṭha a inher chhuak niin lang mah se player 10-a khel Chhinga Vengin champion rinkai an nih chhan an pholang. Minute 67-naah Mapuia ball pek chu Rochhara'n Chhinga Veng goal thumna atan a khung a, minute sarih hnuah captain Rochhara through ball chu minute 74-naah Mapuia'n a khung leh bawk.
Player 10-a khel chungin Chhinga Veng goal nawr a na zel a, Lalthlamuana'n minute 78-naah Salem Veng player pathum bumin goal ngana a khung. NECS Cup champion danglamna khelmual chhungah a lang a, Chhinga Vengin an phu ang ngeiin semifinal an lut.
Eng nge an sawi?
Salem Veng coach Jerry Zoremmawia chuan, "Kan khelh ṭhat ni a ni lo a, kawng engkimah Chhinga Veng an chungnung a ni. Kan veng mipuite ṭawiawmna vangin an chungah kan lawm a, hnehna kan chan zawh loh avang erawh chuan kan inthlahrung hle a ni," tiin an khingpui a fak.
Chhinga Veng boss Jonathan Lalbiakkima chuan, "Kan khelh ṭhat ber ṭum a ni a, khatiang renga kan khelh theih chuan eng team mah kan hlau lo. Mama kan bula a tel hi chuan player pawh an inringtawk a, amah a ṭhat hrim hrim bakah a awm hi chuan kan phur lehzual a ni," tiin an khelh danah a lungawi thu a sawi.
Inkhel Result
Chhinga Veng 5 - 0 Salem Veng
CHH : Lalkhawpuimawia 26', 74'; Rochharzela 35', 67'; Lalthlamuana 78'
Semifinal - Fixtures
1st leg : June 19, Thawhṭanni
11:00 AM Ramhlun South Vs Chhinga Veng
01:30 PM College Veng Vs Chanmari
2nd leg : June 21, Nilaini
11:00 AM Chanmari Vs College Veng
01:30 PM Chhinga Veng Vs Ramhlun South
Final - June 23, Zirtawpni