Aizawla inkhel tur zingah Michael Chopra July 1-ah FPAI XI Vs Mizoram XI

Newcastle United leh Sun­derland tan pawha khel tawh, Michael Chopra chu Football Players Association of India (FPAI) XI tana khel turin Aizawl­ah a rawn zin dawn.

India rama footballer intel khawm pawl, FPAI leh Mizoram XI-te chu July 1, 2017 hian Aizawlah an inkhel dawn - he inkhel tur hi FPAI leh Mizoram Football Association ṭangkawpin an buatsaih a ni.

FPAI hian July 1 zan hian FPAI Awards an sem nghal dawn a, MFA nen he hun pawh hi an buatsaih dun dawn a ni. Mizoramin tun hnaiah football-ah nasa takin hma a sawn a, hei hi FPAI-in Mizorama an hunpui hman an duh chhan pawh a ni.

India rama player ṭha rual hi FPAI hnuaiah an awm a, an aiawh khel turte hi mimal tina hmuh châkawm an ni ang.

An khingpui tur Mizoram XI hi MFA lamin an thlan tur a ni a, Mizo player ṭha an kim viau tura ngaih a ni. A chhan chu MFA hian Mizo player hrang hrang, ISL leh I League-a kan hmuh ṭhinte leh tualchhunga player ṭha aṭangin Mizoram XI tur a thlang dawn.

Tun chinah FPAI aiawha khel turin heng player langsar tak takte hian an tichiang tawh a, chu'ng zingah chuan England tana age group hrang hranga lo inlan tawh Michael Chopra chu hming langsar ber a ni.

Newcastle United-a inzir chhuak Chopra hian Cardiff City tana a khelh laiin hming a chher a, Sunderland-in pound maktaduai 5 zetin an lo lei tawh a ni a, England tan Under 16, Under 17, Under 19 leh Under 20-ah a lo khel tawh. Amah hi Indian thisen kai a ni nghe nghe a, tuna a inziah luhna chu ISL-a Kerala Blasters-ah a ni.

Kum 33-a upa Chopra bakah hian Liberia national team-a khel tura kohna dawng Alfred Jaryan pawh a tel a, Aizawl FC captain hian FPAI tan a khel ang.Mizoram hmachhawn tur la hriat kim loh mah se tih chian tawh player-te an hraw hlawm hle.

India rama player langsar Deb­jit Majumdar (Mohun Bagan), Mohammad Rafique (East Bengal), Gouramangi Singh (DSK Shivajians), Pritam Kotal (Mohun Bagan), Deepak Mandal (Mohun Bagan), Nara­yan Das (East Bengal), CK Vineeth (Bengaluru FC), Renedy Singh (Pune City FC), Eugeneson Lyngdoh (Bengaluru FC), Subrata Paul (DSK Shivajians) leh Jewel Raja (Atletico de Kolkata) te FPAI XI tan an khel dawn.

FPAI chuan Fan’s Player of the Year chawimawina dawng thei tur an thlang chhuak tawh a, thlan chhuah sawm zingah Mizo tlangval Aizawl FC defen­der Zohmingliana Ralte leh Shillong Lajong midfielder Isaac Vanmalsawma-te an tel.

FPAI chuan Foreigner of the Year Award dawng thei tur hming panga an tar chhuak leh tawh a, chungte chu :
Sony Norde Mohun Bagan AC/ Mumbai City FC
Willis Deon Plaza East Bengal Club
Alfred Jaryan Aizawl FC
Darryl Duffy Mohun Bagan AC
Asser Pierrick Dicka Shillong Lajong FC