FIFA Confederations Cup tan a ni dawn ta
Khawlmualpui champion-te inelna FIFA Confederations Cup chu zanin dar 8:30 a-
ṭangin khelh ṭan a ni dawn a, inelna thlengtu Russia leh New Zealand ten match hmasa ber Saint Petersburg Stadium-ah an khel ang. Inelna hi Sony Six chuan live-in a pe chhuak ang.
Tute nge tel?
FIFA hnuaia khawlmualpui paruk champion Portugal (Europe), Australia (Asia), Chile (South America), Mexico (North America), New Zealand
(Oceania) leh Cameroon (Africa) te an inlan vek dawn a. Heng ram paruk bakah hian inelna thlengtu Russia leh FIFA World Cup champion Germany te an tel ang.
Group A-ah Russia, New Zealand, Portugal leh Mexico te an awm a, Group B-ah Cameroon, Chile, Australia leh Germany te an awm thung.
Tun ṭumah hian inelna hnuhnung pathuma champion Brazil an tel pha lo a, champion lai tel loin an khel dawn tihna a ni.
Russia Vs New Zealand
FIFA Confederations Cup-ah hian inelna thlengtu zinga ram pathum Mexico (1999), France (2003) leh Brazil (2013) chu an khawtualah ngei an champion tawh a, Russia tan Confederations Cup-a champion hi thil theih a ni.
Russia coach Stanislav Cherchesov chuan, "Kei chuan theihtawp chhuah loh chuan tel loh tawp ka duh. A sang thei ang ber thlen kan tum tur a ni a, chak theih dan kawng hi aawm zel," tiin beisei a neih thu a sawi.
Inelna thlengtu keeper Igor Akinfeev hian kum 17 a nihin CSKA Moscow tan a khel pha tawh a, kum 31 a nih hnuah pawh an ram rinrawl a ni. Russia hi zanina New Zealand an hmachhawn hunah chak tura rinkai an ni ang.
New Zealand hi Oceania aiawh an ni a, Australia an awm tawh lo chung pawhin an kalkawng hi a awlsam lo. June 11, 2016 khan Papua New Guinea chu OFC Nations Cup final-ah penalty hmangin an hneh hram. An forward Chris Wood erawh chhuan tham a ni a, ani hi Championship club Leeds United tana goal 27 khunga top scorer ni thei a ni.
Portugal Vs Mexico
Group A inkhel dangah team ṭha pahnih Portugal leh Mexico te Pathianni zan dar 8:30 hian an inkhel dawn.
European champion Portugal hian nomawi chawi ngei tumin Ballon d'Or chawimawina kawltu Cristiano Ronaldo hoin an thawk chhuak. Amaherawhchu Mexico keeper Guillermo Ochoa chuan an khingpui tur chu Real Madrid forward tel lo pawha an ṭhat thu a sawi.
Kum 31 mi Ochoa chuan, "Portugal kan hmachhawn dawn a, kan khingpui tur hi Ronaldo a ni lo. A theihna hi kan hrechiang a, chutiang bawkin a kiangah player ṭha rual an awm tih kan hria," tiin an khingpui ṭhat thu a sawi.
Ochoa hian loan-in season liam ta khan Granada-ah a khel a, amah neitu Malaga-a a contract neih lai chu tun thla tawp ruala a zawh dawn avangin tun inelnaa chet ṭhat hi club ṭha zawm theih nan a pawimawh ang. Transfer hun lai a nih avangin club lian leh tein Confederation Cup hi player ṭha zawn nan an hmang dawn a ni.
Cameroon Vs Chile
Group B inkhel hmasa ber chu Pathianni zan 11:30 hian Cameroon leh Chile ten an khel dawn. Copa América champion hi champion rinkai an ni a, Africa Cup champion erawh an che ṭha a nih chuan mak tih an hlawh thung ang.
Ram pahnih hi tun hmain vawi khat chiah an la inhmachhawn a, 1998 World Cup khan 1-1 in an inhnehtawk. Cameroon chhuanvawr Christian Bassogog hi Africa Cup of Nations an champion ṭumin best player atan thlan a ni a, hemi zawh hian Chinese club Henan Jianye FC-in Dutch club AaB aṭangin pound maktaduai nga bawr velin an lalut nghal.
Chile erawh Europe-a player langsar ni phak an kawl nual a, chung zingah chuan Alexis Sanchez leh Arturo Vidal te an neih avangin inrintawkna an ngah ang. La Roja hian Confederation Cup khel tur hian Lionel Messi telna Argentina an hneh thei a, match hmasa berah harsatna an tawh a rinawm loh.
Fixtures
Group A
Zanin Inkhel Tur
Russia 8:30 PM New Zealand
June 18, Pathianni
Portugal 8:30 PM Mexico
June 21, Nilaini
Russia 8:30 PM Portugal
Mexico 11:30 PM New Zealand
June 24, Inrinni
Mexico 8:30 PM Russia
New Zealand 8:30 PM Portugal
Group B
June 18, Pathianni
Cameroon 11:30 PM Chile
June 19, Thawhtanni
Australia 8:30 PM Germany
June 22, Ningani
Cameroon 8:30 PM Australia
Germany 11:30 PM Chile
June 25, Pathianni
Germany 8:30 PM Cameroon
Chile 8:30 PM Australia