Donnarumma a chhuak dawn?

Gianluigi Don­na­rumma chuan AC Milan-ah contract thar a ziah loh tur thu a ti chiang. Kum 18 mi Donnarumma ngaihventu Europe club lian ṭhenkhat tan thu lawmawm a ni ngei ang.

Italy tana match li khel tawh Don­narumma hi a kum la tam lo mah se khelmual chhungah a puitling tawh. Milan tan hian kum 2015 khan inlan ṭanin Serie A match 68 a khel tling der tawh a ni.

Donnarumma hian San Siro-ah kum khat daih bak contract a neih tawh lo, Milan hian a contract a hman zawh huna man nei loa chhuah tir ai chuan manto taka hralh theih a nih laia chhuahtir an thlang zawk ngeiin a rinawm.

Italy champion Juven­tus bakah Real Madrid, Manchester United leh Paris Saint-Germain te chuan Donnarumma hi lakluh an duh vek nia sawi a ni a, an inchuh na hle tura ngaih a ni.

AC Milan director Marco Fassone chuan, "Kan club sporting director Massimiliano Mirabelli-a'n a cham chhunzawm theih nan contract duh­awm tak a siamsak. Mah­se, Donnarumma-a agent Mino Raiola chuan a player-in contract thar ziah a duh loh thu min hrilh a ni," tiin a sawi.

Serie A parukna Milan hian tun hma lama an ropuina ang kha neih let leh tumin hma an la mek. Tun nupui chhungin Portuguese striker Andre Silva, Ivorian midfielder Franck Kessie leh defender pahnih Ricardo Rodriguez leh Mateo Musacchio te an lalut tawh.