Transfer bazarah Everton an che na Ajax captain leh British keeper manto ber an nei ta

Ronald Koeman-a hoa Europa League khel tur Everton-in hmasawn zel an tum, British keeper manto ber ni tura Jordan Pickford an lakluh hnuah Ajax captain Davy Klaassen an neih belh leh ta!

Premier League-a pasarihna Everton hian midfielder Klaassen manah pound maktaduai 23.6 an seng a, kum 24 mi hi Goodison Park-ah kum nga cham turin contract an ziahpui.

Ajax captain

Netherlands international Klaassen hi tun lai midfielder hmuhnawm zingah a tel phak, kum 2011 khan Ajax tan a match hmasa ber khelin a seilenna club tan hian inelna hrang hrangah match 163 a khelh aṭangin goal 49 a khung thei a, league nomawi vawi thum a chawipui - ball a sem thiam bakah goal hmaah a hriam tel.

Season hnih chhung Ajax captain nihna chelh hman Klaassen chuan, "Ajax chhuahsan hi a harsa hle, mahse hmasawn zel ka duh a nih chuan tun hi ka tan hun ṭha niin ka hre ve thung," tiin a thlen chin aṭanga hmasawn a inbeisei thu a sawi.

Season liam ta a Everton midfielder langsar Ross Barkley-a'n Goodison Park-a cham chhunzawm zel turin contract a la pawt sei duh lo a, kum 23-a upa Barkley a chhuak a nih pawhin a aiawh tur an nei ta a ngaih a ni.

Ram tana match 14 khel tawh Klaassen chuan, "Manager nen inbiakna kan nei a, club hmasawn tum dan leh a khelh tir duhdan min hrilh, chu chuan min ti lawm hle," a ti. Klaassen hian season liam ta khan a club chu Europa League final a hruai thleng a, Manchester United lakah an chak lo thung.

Toffees manager Koeman chuan a player thar chungchang sawiin, "Kum 24 mi chauh a la ni a, season hnih chhung Ajax captain a ni thei tawh. A kum la tam loh ngaihtuahin tawnhriat a nei hnem tawh, a thawkrimin a goal nawr a na bawk. Inkhel mawi bakah goal mawi kan hmuh tel ngei ka beisei," tiin a sawi.

Player pahnih manah pound maktaduai 50 vel hmang tawh mah se Everton-in an la duhtawk lo. AC Milan striker M'Baye Niang lakaluh an la tum mek, kum 22-a upa Niang hian season hmasa khan Watford tan loan-in a khel. Tunkar chho khan Everton director of football Steve Walsh chu Milan-ah hmuh a ni a, transfer chungchang an sawi nia ngaih a ni.

Pickford man a to

Season hmasa khan Everton hian goal 62 an khung a, an lamah goal 44 a lut thung. Anmahni aia goal khung tlem zawk Manchester United (54 goals) aia an chhuah hnem avangin an goal difference a chhe zawk - hmasawn tur chuan Koeman-a'n goal venhim a pawimawh tih a hria, chu mi tur chuan sum a seng huai.

Kum 23-a upa Pickford manah Everton hian pound maktaduai 25 an pe phawt a, pound maktaduai 30-a pung chho leh thei a ni bawk. Sunderland keeper hlui hian Goodison Park-ah kum nga daih contract a ziak.

Pickford hi British keeper manto ber a ni a, pound maktaduai 10 man Fraser Forster a khum chiang hle. Khawvel huap chuan pathumna a ni. A tluk loh chu Juventus keeper Gianluigi Buffon (£32.6m) leh Manchester City keeper thar Ederson Moraes (£35m) te an ni.

Black Cats' academy aṭanga inzir chhuak Pickford hi loan hmangin - Darlington, Alfreton Town, Burton Albion, Carlisle United, Bradford City leh Preston tan te a khel tawh. Season hmasa khan Sunderland tan league match 29 khelin a club chu Premier League-ah a inhamtanpui zo lo.

England U21 keeper chuan, "Season khat chauh Premier League ka la khel a, club ropui Everton tan khelh theihna hun ṭha ka nei chhunzawm thei tur hi ka lawm hle," a ti. Pickford hian season hmasa khan league match a khel apiangin vawi 4.7 zel save nei ang a ni a, Premier League keeper zingah ani aia mahni lama goal lut tur dang hnem an awm lo.