I League khelh duh club an tam
Bengaluru FC-in season thar aṭangin Indian Super League an khel dawn a, Bangalore club hmun ruak chan inbeisei club an lo lang nghal. I-League CEO Sunando Dhar chuan, "Kerala-a Trivandrum leh Malappuram khawpui aṭangin I League khelh dil an awm tawh a, Bangalore aṭanga I League club neih pawh kan duh," a ti.
Bangalore aṭang hian Ozone FC chuan AIFF hotute hnenah I League khelh dilna an thehlut tawh a, anni hi second division-a inlan mek niin final round-a inlan turin group stage an paltlang zo lo.
Manipur club Neroca FC chu second division-ah hian an champion a, season thara I League khel tur chiang an ni.
DSK an chiang lo?
I League leh ISL dinhmun a chiang hleithei lo a, Pune club DSK Shivajians chuan season hnih an hman hnuah I League aṭanga inhnuhdawh an tum nia sawi thawm a awm a, thuchiang erawh engmah a la awm lo.
British coach Dave Rogers-a enkawl club hi an inhnukdawk a nih chuan I league-ah hmun ruak pahnih a awm dawn tihna a ni.
Tun hnaiah DSK hi sum lamah an tlachhia a, an player
ṭhenkhat chu February hnulamah an hlawh an pe tawh lo hial. Sum lam harsatna hi Pune club inhnuhdawh chhan tur anga sawi a ni a, club thuneitute lam chuan ISL vanga I League dinhmun chiang lo lutuk chu inhnuhdawh an duh chhan niin an sawi thung - hlawh an pe ṭha lo tih erawh a chiang.
Goan club Churchill Brothers chu ISL leh I League buaina avangin inhnuhdawh ve mai an tum nia sawi thawm a awm bawk a; he boruak avang ringawt hian Royal Wahingdoh, Salgaocar, Pune FC, Bharat FC leh Sporting Club De Goa te chu I League aṭangin an lo 'bang' tawh.
Tute nge Ozone?
I-League CEO Sunando Dhar mai ni loin AIFF general secretary Kushal Das-a'n Bangalore aṭanga I League club neih ngei an duh thu a sawi a, Ozone FC an lo lang nghal.
Bangalore Super Division (2015-16) champion club hian AIFF hnenah lehkha an thehlut a, an lehkha thehluhah hian residential academy changtlung tak an neih thu leh India U17 leh U16-ah an academy naupang an awm nual thu an tarlang.
Ozone FC hian I League an khel a nih chuan Bangalore Football Stadium chu an khelmual atana an hman tur a ni dawn a, he stadium hi Karnataka State Football Association (KSFA) chuan siamṭhat a nih theih nan Ozone hnenah hian contract an lo pe tawh a ni.
Bangalore club neitu Ozone Group hi Chennaiyin FC pawh lo sponsor tawhtu kha an ni a, Mohun Bagan striker hlui Cornell Glen lalut a, Bengaluru aṭanga Honduras striker Roby Norales loan hmanga la 'ngam' kha an ni a, I League hi khel pawh nise sum lamah buaina a awm lo ang - tun dinhmunah hian Dutch coach Bert Zuurman enkawlna hnuaiah an awm mek.
Khawiah nge Mumbai?
Santosh Kashyap kaihhruaina hnuaia pathumna nih tum Mumbai FC-in an beisei ang an thleng pha lo a, I League khelh zawh takah a mawngphah niin an relegate. Bengaluru FC-in season tharah ISL an khel dawn tih a chian rual khan Khalid Jamil-a club hlui hi Aizawl FC anga tlak tawh hnua I League lama hruai let mai an nih rinna a sang hman hle a, mak takin Mumbai FC hian thawm an la nei miah lo thung.
AIFF general secretary Kushal Das chuan, "Tun thleng hian Mumbai FC hnen aṭangin engmah kan la hre lo," a ti a, Maharashtra club-in an la dawr loh thu a sawi. Essel Group enkawlna hnuaia awm Mumbai FC-in ngawih an chuh chhanah rin dan tam tak a awm.
Mumbai FC hi season hmasaa India rama league sang bera ISL dah tum a nih chungchanga thawm nei na ber pawl kha an ni a, Asian Football Confederation-ah hial an zualko. Hetiang a lo nih tawh avang hian Mumbai FC hian I League khelh dil leh ai chuan club neih chhunzawm loh mai an thlang a nih pawhin a mak lo ang.