Bayern Munich-ah Corentin Tolisso a lut

Bayern Munich chuan France international midfielder Corentin Tolisso chu Ligue 1 club Lyon aṭang­in kum nga chhung atan an lalut.

Kum 22-a upa Tolisso hian kum 13 mi chauh a nih laiin Lyon a zawm a, 2013-14 season khan a club tan hian inlan ṭanin kum li chhungin a club tan hian goal 21 a khung.

Season liam ta khan Tolisso-a'n a club tan inelna hrang hrangah match 47 khelin goal 14 a khung. Allianz Arena-ah hian Franck Ribery leh Kingsley Coman te hnungzuiin French player pathumna a ni ang.

Bundesliga champion hian an squad tih chak zel an tum, tun nipui transfer chhungin Carlo Ancelotti-a'n Kingsley Coman, Niklas Sule, Sebastian Rudy leh Serge Gnabry te a lalut tawh bawk.