Mizoram tan hmachhawp kan nei - Gopichand

India chief national coach Pullela Gopichand chuan, Mizoten badminton-a thleng sang turin theihna an neih thu a sawi a; Mizoram tan hmachhawp an neih thu leh rawn zin leh ngei a tum thu Vanglaini a hrilh.

India rama badminton hmelhmang thlak danglamtu Gopichand hian Zirtawpni khan Mizoram rawn thleng a. Tlai lamah Secretariet Conference Hall-ah Hmingdailova Khiangte, Parliamentary Secretary, Sports Department kaihhruaina hnuaiah Mizoram badminton hmasawn dan tur an sawi ho.

He mi zawh hian kum 43 mi coach hian Tata Trusts Sports, Mizoram Bad­­­min­ton Association leh Gopichand Badminton Academy-te ṭangkawpin an buatsaih Sub Junior Badminton Talent Search Tournament final chu a thlir nghal bawk.

Gopichand rawn zin hma hian academy-a head coach Rajendra Kumar leh manager P. Srikanth te chuan Mizo naupang zir chiang turin inelna ṭantirh aṭangin an awm chilh tawh bawk.

Tun hnaia India ram shut­tler ṭha Saina Nehwal, P. V. Sindhu, Srikanth Kidambi leh Prannoy Kumar-te hi Gopichand Academy chhuak vek an ni.

Gopichand chuan, "Kan academy-a awm tura Mizo naupang kan thlan leh thlan loh hi kan la sawi thei lo a, Mizoram tan hmachhawp chu kan nei a, he mi chungchang hi haw thlak hunah kan sawi ho ang," tiin Vanglaini a hrilh.

Gopichand hian Mizote chuan infiamna hrim hrim an pianpui thu a sawi a, hmasawnna tur a awm thu a sawi lang bawk.

Inrinni khan MBA aiawhte, Tata Trusts sports head Anand Datla leh Aizawl bawrh­sap Kannan Gopinathan-te hoin Gopichand Academy-a an hotute hian chief minister Lal Thanhawla a kawm a, he mi zing hian Sihphir-a Training Centre neihna tur hmun an tlawh a ni.

Gopichand chuan, "High altitude training centre hi kan mamawh a, kan duh ang siam theihna tur hmun pawh kan hmu. Amaherawhchu he mi chungchang sawi chiang tur chuan a la hma lutuk deuh a, hmabak a la thui hle," tiin thuchiang a la sawi duh lo.

India chief national coach hian Inrinni tlai khan Mizoram-a badminton coach te training dan hmang a hrilh a, "Training-na hmun ṭha pawh coach ṭha a awm loh chuan engmah lo mai a ni. Chutihrualin training hmun ṭha lo pawh coach ṭha a awm chuan beisei tur a awm a ni," tiin a fuih.

Nimin khan Gopichand leh a thawhpuite hian Hyderabad lam panin Mizoram an chhuahsan a ni.

Mizorama badminton-in tun hnaiah hma a sawn chho zel a, MBA hian Tata Trusts nen ṭangkawpa naupang 600 zir theihna tur grassroots centre 10 hawn thuai an tum a ni.