CYMA Football Vawiinah semifinal thawh khatna
CYMA leh MFA ṭangkawpin an buatsaih TṬ Royte Trophy - Inter Branch YMA Football Tournament semifinal thawh khatna chu vawiin hian Lammualah khelh a ni dawn a, LPS leh Zonet-ah live a ni ang.
Tlai dar 1:00-ah semifinalist zinga CYMA Football-a champion tawh awm chhun Ramhlun South-in NECS Cup champion Chhinga Veng an hmachhawn ang.
Inelna liana la champion ngai lo College Veng chu tlai dar 3:30-ah 2012 Red Ribbon Football champion Chanmari nen an inkhel bawk ang.
Vawiin inkhel en man hi Rs 30 a ni a, double leg-a khelh tur a nih avangin final lut tur a hriat nghal dawn loh. Second leg hi June 21, Nilainiah khelh leh tur a ni.
Incho ve ve
Ramhlun South coach HC Zarzoliana chuan, "Chhinga Veng ai chuan kan ṭha zawk turah ka ngai," tiin Vanglaini a hrilh. Chhinga Veng coach Jonathan Lalbiakkima chuan, "Ramhlun South hi kan tum châkna a rei tawh a, Round of 16 aṭanga khan anni nena kan khelh hun hi kan nghak tawh a, tunah chuan kan nghak chhuak ta," tiin a hlauh loh thu a sawi ve bawk.
Chhinga Veng hian an match hnuhnung berah player 10-a khel chungin Salem Veng 5-0 in an sawp thei a, team ṭha an ni tih nemnghet mah se Ramhlun South an hmachhawn hunah midfielder Lalchhuanpuia an chhawr thei dawn lo. Ramhlun South coach Zara chuan Chhinga Veng thiampuipa S. Malsawmtluanga chu an ven tur thu a sawi.
Aizawl FC coaching staff zinga mi ni bawk Jojo-a chuan, "ChP-a tel lo hi kan buai phah lo ang. A thlakna tur kan nei a, Mama chauh hi kan innghahna an ni lo. An veng hneh a nih pawhin ven tur dang an la tam a, an veng seng lo ang," tiin a naute a ringtawk hle.
Ramhlun South leh Chhinga Veng inkhel tur hi a hmuhnawm dawn. Ramhlun South ṭantuten kawr sen nen Lammual an pan ang a, Chhinga Vengin kawr var an ha thung ang. Team pahnih an intluk tawk avangin entu mipui an pawimawh ang.
Chanmari nge College Veng?
Chanmari vengin an goal khung khawl Jerry Mawihmingthanga chu India Under 23 team-a koh a nih avangin an chhawr thei dawn lo a, Aizawl FC defender Lalhriatrenga (Achia) an chhawr thei dawn lo. Amaherawhchu an khingpui tur College Vengin hrem vangin Edenthar-a an hmang thei dawn lo a, inhliam vangin a nau Ramfangzaua hman theih a ni dawn lo a, KC Lalchhuanmawia phai lamah a kir leh tawh bawk.
Chanmari coach Chawngthansanga chuan, "Jerry tel loa khelh kan zir theih nan kan match hnuhnung bera Hualngohmun kan hmachhawn ṭumin kan hmang tawh lo a, kan buai phah ka ring lo. Chutihrualin kan khingpui tur hi Pu Thlanga hote an ni a, hmachhawn an khirh khawp ang," tiin a ṭawng huai duh lo.
Veteran coach Thlanga a inhrosa duh bik lo a, College Veng pachal chuan, "Kan kim dawn lo a, chuvangin kan chungnungna bik a awm lo. Amaherawhchu training-naah kan chak lohna lai kan insiamṭha tawhah kan inngai a, final thlen ngei tumin kan khel ang," tiin Vanglaini a hrilh.
Tualchhung football season tharah Thanga'n Chanmari FC a enkawl dawn a, Chawnga hian Bethlehem VT FC a enkawl thung dawn. Vawiin hi veng inelna a nih rualin coach inbeihna a ni tel nghal ang.
Semifinal - Fixtures
1st leg : Vawiin Inkhel Tur
01:00 AM Ramhlun South Vs Chhinga Veng
03:30 PM College Veng Vs Chanmari
2nd leg : June 21, Nilaini
01:00 AM Chanmari Vs College Veng
03:30 PM Chhinga Veng Vs Ramhlun South
Final - June 23, Zirtawpni