PVL-ah club awm belh dawn

Mizoram Volleyball Association chuan season thar aṭangin Pro Volleyball League-ah club paruk awm turin thutlukna siam a, playoff khel tur club tan June 30 thleng dilna thehluh theih a ni.

Inrinnia MVA OB meeting chuan PVL khelh meka club-te khelh dan uluk taka a thlir hnuah eng club mah relegate lo turin thutlukna a siam. Tun season-ah champion lai Anastasia an tel loh avangin team panga chiah an inel a, ruahmanna tharah chuan 2017-18 season aṭangin team paruk an awm leh tawh ang.

PVL-a hmun ruak pakhat zawnna R. Dengthuama Indoor Stadium-ah July 3-6, 2017 inkarah neih a ni dawn a, inelna tel tur club chuan veng/khua innghahna an nei ngei tur a ni. Playoff khel tur club ten anmahni awptu District Volleyball Association hriatpuina lehkha an nei ngei tur a ni a, tun ṭuma Pro Division player te hian playoff hi an hmachhawn thei lo ang.

Playoff khel tur club ten June 30, 2017 tlai dar 3:00 hmain MVA general secretary C. Lalrokhuma hnenah document te an thehlut hman ngei tur a ni a. Hriat chian loh nei tan phone number 9436140082-ah zawhfiah theih a ni.