Hmeichhe volleyball champion Power SC

Mizoram Volleyball Asso­cia­tion hnuaiah inelna lian leh ngaihhlut GIG Motors Pro Volleyball League hmeichhe final-ah Power Department Spor­ting Club chuan Electric Veng 3-1 a hnehin nomawi an chawi.

Zirtawpni zan R. Dengṭhuama Indoor Stadium, Mual­puia inkhelah league round-a hneh loh tawng lo Power SC hian 13-25, 25-15, 25-21, 25-16 in hnehna an chang a ni.

Team pahnihte hi league round lamah an intawng tawh a, inkhel inhnehtawk takah Power hian 3-2 in hnehna an chang. Electric Veng hian an intawn hmasak an an chhawr hman loh Preeti Singh an neih belh tawh avangin beiseina an nei sang a, bul pawh an ṭan fuh zawk.

Kolkata nula Preeti hoa khel Electric Veeng hian set hmasa ber 13-25 in an la! Mah­se, tualchhung volleyball-a tawnhriat nei ṭha Power lamin hun pawimawhah Vardingliani hoin an huaisen zia lantirin set hnuhnung pahnih an la zawn a, hnehna an chang.

Feet 6 leh inch 2-a sang Preeti-i'n final-ah point 25 hmuin player malah ani aia thawhhlawk an awm lo - LG D3 Player of the Night atan thlan a ni.

Team pathum inel zingah Power-in hneh loh an tawng lo a, champion nomawi chawi tur hian set 12 an khel. Heng an khelh zawng zawnga player pawimawh chu Vardingliani a ni. Dingi hian tun PVL-ah hian point 72 a hlawh chhuak. India team-a tel tawh Dingi hian KT Panasonic Best Player atan thlan a ni hi a phu.

Hmeichhe champion Power-in Rs 50,000 an dawng a, pahnihna Electric Veng kutah Rs 30,000 hlan a ni thung; pathumna Durtlangin Rs 10,000 an dawng ve bawk - Durtlang player F. Lalparmawii chu Best Emerging Player atan thlan a ni.

Power SC coach Eric Lal­sang­liana Pautu hian season hmasa khan Electric Veng mipa team Anastasia a champion pui tawh. PVL 2-ah Power enkawlin hmeichhe team champion hmasa ber a nihpui leh thei. Mipa final-ah rin kai ni chungin Chhinga Veng a kaihruai dawn bawk a, Thawhlehni zanah Hunthar nen an inkhel ang.

Mipa inelnaah hian team panga - TNT, Hunthar, 3rd MAP, Chhinga Veng leh Ram­hlun Sporting Club te an inel a, an inkhelh kual hnuah a sang pa­liin semifinal khelin atawpah Chhinga Veng leh Hunthar hi a sang pahnih zingah an inhlangkai.