Indonesia-ah Srikanth a champion

Indian badminton star Srikanth Kidambi chuan Kazumasa Sakai 21-11, 21-19 a hnehin Indonesia Superseries Premier nomawi a chawi. Hyderabad tangval hian Super Series Premier title vawi hnih a lakna chiah a ni a, India player zingah he hmuna champion thei hmasa ber a ni.

Nimin tlai Jakarta Con­vention Center-a in­khelah kum 24 mi Srikanth hian attacking game hmuhnawm khelin Japanese shuttler lakah hatsatna nei loin game hmasa ber 21-11 in a la.

Player pahnihte hi BWF tournament-ah vawi khat an intawnna a ni a, seeded chang phak lo chunga final lut thei Sakai-a'n thapui thawh ve lehin point an inhmuh chhawk zak zak, tu zawk mah an sang fal lo. Game tawp dawn thlengin 19-19 a ni, hun pawimawhah Srikanth-a'n point hnih hmu zawnin hnehna a chang a ni.

World number 22 Srikanth hian final lut tur hian semifinal-ah world number 1 Son Wan Ho chu 21-15, 14-21, 24-22 in a lo hneh tawh bawk a, Indian shuttler dang HS Prannoy-a'n semifinal a thlen ve bawk avangin Indonesia-ah Indian tlangvalte an langsar hle.

Super Series Premier title a lak avangin Sri­kanth hi world ranking chhuak tharah number 2 a ni dawn a, world ranking-ah chuan a career-a a tawn san ber ṭum a ni ang.