Federer leh Murray inlan dawn

Wimbledon inbuatsaih nana player langsar ten an hman ṭhin Aegon Cham­pionship chu vawiin aṭangin khelh ṭhan a ni dawn a, world number 1 Andy Mur­ray leh Roger Federer te an inlan ang.

Chawhnu dar 2:30-ah seeded pakhatna leh champion lai ni bawk Murray-a'n Aljaz Bedene a hmachhawn dawn, nikum khan player pahnihte hi an inkhel tawh - Murray-a'n hnehna changin nomawi a chawi zui bawk.

Grand Slam vawi 18 champion tawh Federer-a'n grass court-a a ropuina ang kha neih leh a tum mek a, chawhnu dar 1:30-ah Yen-Hsun Lu nen an inkhel ang. Swiss star hi kumin clay court inelna lamah a inlan miah lo a, hei hi a kum tam tawh bakah grass-a hlawhtlin theih a beisei vang a ni.

July 3 aṭangin Wimbledon khelh ṭan a ni dawn a, grass court tournament-ah hian Stan Wawrinka, Nick Kyrgios, Sam Querrey leh Milos Raonic te pawh an inlan dawn.

Hetihlai hian Juan Martin del Potro erawh a ṭhâl na vangin a inkhel thei dawn lo. Kum 28 mi Del Potro hi hliam vangin a buai ngun hle. French Open third round-ah Murray a hneh lo a, he mi hnuah a la inkhel leh thei lo. Del Potro bakah hian Rafael Nadal chuan hahchawlh a duh avangin a inhnukdawk tawh bawk.