Football-ah dan thar kan hmu dawn?

Khawvel huap in­fiamnaa ngaihhlut hlawh ber football dan siamtu International Football Association Board (IFAB) chuan football dan thar a siam tura ngaihtuah tur a chhawp chhuak nual a, heng zinga ngaihven hlawh ber pakhat chu minute 90 inkhel tawh loa minute 60 chhung inkhelh a ni.

Football dan hman mekah first half leh second half chu minute 45 ve ve a ṭhen a ni a, minute 90 khelh a ni ṭhin. Tuna ruahmanna thar ang chuan minute 30 ve vea khelh tur a ni ang a, mahse khelmual chhungah player inhliam leh thil dang a thlenin referee-in a sana a ti thi zel thung ang.

Entir nan penalty pek an ni a, penalty pek an nih aṭanga a petna tur hmuna ball an dah hun chhung chu inkhelh hun chhungah chhiar a ni dawn lo. Lehlam pawlin an pet goal a, ball tih nun leh a nih hma chu referee-in a sana a ti tawp rih ang tihte a ni a, he dan hi hman a nih chuan hmahruaitu team lamin hun khawhral nana ball khalh rei luih te, inhliam der ang chi te pawh pumpelh vek a ni thei dawn tihna a ni.

Dan thar ni tura chhawpchhuah langsar zingah stadium khelhna sana leh referee sana in­mil thlap tura tihte, freekick, corner leh goal kick mahnia khalh nghal theih tihte, a kut hmanga goal khung emaw goal tur dangtu red card pek tihte, penalty pet goal loha ball let lehlam pet goal theih loh tihte a tel.