Ronaldo-a'n Real chhuahsan a duh
Maktaduai tel chhiah awl ru-ah Cristiano Ronaldo puh a ni a, mahni induh tawk ve tak Ronaldo-a thuthar neih hmasak ber chu Real Madrid chhuahsan a duhthu a ni - Portugal captain hian dik taka chhiah a pek thu a sawi a, dik lo taka amah puhtute awmna 'Spain'-a awm reng a tum lo.
Cristiano Ronaldo lam hnai tak pakhat chuan, "Ronaldo hian dik takin chhiah a peah a ngai a, a tih tur zawng zawng a tiah a inngai a ni. Tun dinhmunah chuan a lunghnur em em a, Spain-a chen reng hi a duh tawh lo," a ti - Real Madrid tana Champions League nomawi pathum chawi hi 2011-2014 inkar khan pound maktaduai 13 chhiah awl ruah puh a ni.
Mi luhlul Ronaldo
Kum 2009 nipui transfer-ah Real Madrid-in Manchester United aṭangin pound maktaduai 80 man Ronaldo chu khawvela player manto ber ni turin an lalut a, 2009-a Ronaldo an lakluh hma 2008 nipui laia Portuguese forward lakluh an tumna kawnga lo hlawhchham tawh Real president hlui Ramon Calderon chuan Manchester United forward hlui rilru thlak chu thil harsa tak a nih tur thu a sawi.
Calderon chuan, "Ronaldo hian a thinrim lai takin he thu hi a sawi chhuak palh pawh a ni thei a, engmah thu chiang a la awm lo. Mahse, hei hi a rilru tak tak aṭanga sawi chhuak a nih erawh chuan a ngaihdan sawhsawn hi a harsa tawh dawn tih ka chiang a ni. A chhuak tak tak a nih chuan sum tamna China leh Middle East lamah a kal ka ring hauh lo a, nomawi leh mimal chawimawina tam tak a dawn theihna tur club lian tho a pan ka ring. Ka beiseina erawh he hmuna a cham hi a ni," a ti.
Ronaldo game 'play'
Kum 2012 khan Ronaldo-a'n Real-a a lungawi loh thu sawiin a lungawi loh chhan club-in an hriat thu a lo sawi tawh a, fans leh club board lam an talbuai hman hle. Portugal captain hian ngaihsak hlawh 'ber' nih a duh reng a, Spain rama Reuters correspondent Richard Martin chuan Ronaldo hian game dang a 'play' leh mai nia a ngaih thu a sawi.
Martin chuan, "Portuguese chanchinbu A Bola-ah Ronaldo chhuah duh thu hi an tarlang a, he thu hrilh tur hian Ronaldo lam hnai chuan Spain rama chanchinbu langsar ho zawng zawng chu phone hmangin a be vek. Hei hi chhiah awl rua puh a nih avanga a sum senso leh thil thleng tur tam tak thlir lawka Ronaldo-a'n contract thar duhawm zawk a nawrna pakhat a ni thei a ni," a ti a, hetihrual hian Real fans laka a lungawi loh thu sawi fo Ronaldo hi Real tan player 'rinawm' tia chhal theih a nih loh thu a sawi bawk - Ronaldo a chhuak a nih pawhin a mak lo ang.
Club an 'nghing'
Real Madrid tan match 394 lek a inlana goal 406 khung thei forward-in Spain chhuahsan a duh thu a sawi a, club lian nia inngai chin an nghing nghal. Ronaldo contract-ah pound maktaduai 874.88-a lei duh an awm a nih chuan a chhuak thei ang, tiin ziah ni mah se kum 32-a upa forward hian chhuah a duh tak tak a nih chuan Real hian a kawng dal ṭalh an tum lo nia sawi a ni - Real hian pound maktaduai 350 an beisei dawn nia sawi awm mah se Ronaldo adviser chuan pound maktaduai 131 vel a ngaih tur thu a sawi a, he pawisa hian Real chuan Monaco forward Kylian Mbappe lakluh an duh nia sawi a awm lehzel.
Ronaldo duhtu zingah Manchester United leh Paris St-Germain an langsar fal a, Chelsea neitu Roman Abramovich chuan khawvela player manto ber ni tura Ronaldo lakluh a hnial lo nia sawi a awm bawk. Ronaldo hian a lunglenna lam hawi zawnga ke a pen dawn a nih chuan vawi 292 inlana goal 118 a lo khung sak tawh United lam a hawi a rinawm a, sum ngah PSG president Nasser Al-Khelaifi nen hian inṭhian ṭha tak an ni tih erawh theihnghilh loh a ṭha.