Confederations Cup World champion Germany an inlan dawn

FIFA Confederations Cup khelh mekah zanin hian match khat khelh tur a awm dawn a, zan dar 8:30-ah Asia champion Australia leh World champion Ger­many an inhmachhawn dawn.

Ram pahnih hi an dinhmun en mai chuan chak turin Ger­many dah an awlsam zawk a, mahse coach Joachim Low-a'n naupang rual a hruai avangin tawnhriat nei ṭha rual Australia an chak a nih pawhin a mak lo ang.

Intawnna hmasa

Germany leh Australia hi vawi nga ngawt an lo inhma­chhawn tawh a, a chungnung zawk chu world champion Germany an ni. Hei erawh hriatreng a ṭha - team pahnih intawn hmasak pathumah Germany an chak a, a hnuhnung pahnihah Australia hi vawi khat chakin, vawi khat an inhnehtawk.

Tournament of Champions tia hminglem an pek inelnaah hian 2005 khan ram pahnih hi an lo intawng tawh a, 4-3 in inelna thlengtu Germany an chak a, pathumna an ni zui. Socceroos (Australia) erawh group stage-ah an tla - Asia champion-in thawnthu hlui thlen nawn tir an duh lo ang.

Naupang rual

Germany hi World Cup 2014 champion an nihna anga tel an nih thu sawi chuan team hlauhawm tak niin lang mah se Brazil-a champion team zingah Shkodran Mustafi, Matthias Ginter leh Julian Draxler chiah Russia-a kal zingah an tel a, Low-a'n naupang rual chher nan hman a tum. Germany hi an an match hnuhnung 10-ah vawi riat chaka, vawi hnih an khingpui inhnehtawkpuitu an ni a, goal 31 khungin goal khat chiah an chhuah - Australia tan a awlsam dawn lo.

Player naupang rual a hruai avanga sawisel hlawh Joachim Low chuan, "Confederation Cup-a kan thil tum chu result hlawhchhuah niloin naupang rual ten hmasawn nan hmang se tih hi a ni a, vawiina kan hnathawh hi nakkumah emaw kum thum hnuah kan la chhawr ang," a ti a, hma hun a thlir avanga player naupang rual hruai a nih thu a sawi.

Germany tan kum 22 hnuai lam ṭhah Bayer Leverkusen winger Julian Brandt, Hoffen­heim aṭanga Bayern Munich pantu Niklas Sule, RB Leipzig rawlthar duhawm Timo Werner leh Bayern midfielder Joshua Kim­mich-ten en bik an hlawh ang.

Tawnhriat nei Australia

Confederations Cup-ah Ger­many aiin Australia-in tawnhriat an ngah zawk a, 1997, 2001, leh 2005-ah te khan an lo inlan tawh. Socceroos squad-ah Germany-a tawnhriat nei tawh an awm nual a, VfB Stug­gart goalkeeper Mitchell Langerak, Hertha BSC forward Mathew Leckie, Darmstadt striker thar Jamie Maclaren leh Bayer Leverkusen forward hlui Robbie Kruse-te an awm a, German ral lian hmaah zam an tum lo ang.

Asutralia tan kum 12 hnua Confederation Cup an khelh leh hmasa ber tur a ni a, tun hnaia an buaina chu an tlarhnung hi a ni. Tournament inbuatsaih nana an match hnuhnung berah Brazil chu 4-0 ngawtin an ngam lo a, goal khung thiam Germany lakah tlarhnung ven uluk a ṭul dawn tih a chiang.

Socceroos coach Ange Pos­tecol­gou chuan, "Germany hian thla 12 hnuah World Cup nomawi chawi an duh avangin tun hi inbuatsaih nan an hmang a, chuvangin kan inpeih a ṭul a ni. Tournament hun a lo thlen hi chuan Germany hian team danglam bik an nihzia an pholang fo a ni," tiin fimkhur a ṭul tur thu a sawi.