Team ṭha Mizoram Police inlan hun

I Day Football 2022-a champion rinkai ber Mizoram Police chu vawiin hian an inlan dawn a, vawiin chawhnu dar 2:30 hian Chhinga Veng FC an hmachhawn ang. Chhun dar 12:00-ah champion lai Electric Veng FC leh Chanmari FC te an inkhel dawn a, Lammual inkhel tur pahnih hi a hmuhnawm ve ve ang.

Police chu
I Day Football record en let chuan Police-in record an nei ṭha fal a, vawi 37 inelna neih tawhah 1st Bn. MAP-in vawi 22 final lutin vawi 14 an champion a, 3rd Bn MAP vawi khat an champion tawh bawk. Mizoram Premier League ṭan dawn khan Police hi team khatah dah khawm vek an ni a, Mizoram Police tih an ni.

Kum 2012 khan Mizoram Police hian I Day Football nomawi an chawi a, Mizoram Premier League-ah pawh champion rinkai ni mah se All India Police Meet khel tura an zinchhuah avang leh hun pawimawhah an chetsual avangin an hun ṭha an bawhpelh a, Dinthar FC an champion ta zawk.

Mizoram Police hi team ṭha ni chhunzawm mah se kum 2012 hnuah I Day Football an la chawi leh lo a, tun hi an tan hun ṭha a ni. MPL club dangin Covid-19 hluar hma player-te an chelh theih loh laiin Police erawhin player-te an kawl ṭhap a, training an neih ṭhat bawk avangin an ṭha dawn.

Police hian position tinah player ṭha an kawl a, goalkeeper-ah Lalmuanawma a awm avangin Inter Village Football-a Ramhlun North semifinal thlenpuitu keeper Lalṭanpuia tan pawh khelh phak a har ang. Tlarhnungah Lalrinzuala Khiangte leh Lalhmunmawia (Ahmuntea) te an awm a, midfield-ah R. Malsawmtluanga leh H. Lalbiakthanga te an awm a, tlarhmaah Lalbiakhlua, Lalfakzuala, F. Lalrinpuia leh Malsawmfela te an awm. Tualchhung football-a tawnhriat ṭha rual an awm.

Police khingpui tur Chhinga Veng erawh player naupang rual an ni dawn. Chutihrualin Inter Village-a Champhai Kanan lakah goal nga khung thei Lalrinzuala Hauhnar bakah Serchhip mifielder Johny Lalremruata leh Republic Veng goalkeeper RS Lallawmzuala te an awm a, danglamna an nei thei ang.

Chanmari pawh hi...
Mizoram Police an ṭha a, chutihrualin Chanmari FC hi sawi nep theih a ni lo. Chanmari FC hian phai lama tawnhriat nei Lalramchullova leh Malsawmzuala te an lalut thei a, tualchhung football-a an ṭha tih nemnghet tawh H. Lalmuankima leh Joseph Lalnunpuia te an kawl. Player chhuak thar ṭha F. Lalnuntluanga, Lalhriatpuia, Lalremruata, C. Lalnunzira eh Eric Lalsangzuala Kawlni te an nei bawk.

Chanmari hi coach Rochingpuia'n a enkawl dawn a, Chanmari fapa rangkachak tiha sawi ṭhin Chhinga'n senior level-ah manager career a ṭan dawn. Electric Veng erawh champion lai ni mah se team nem tur zinga mi an ni a, chutihrualin tualchhung football hrechiang enkawl an nih avangin Chanmari tan zuam ngawt a rem lo ang.