Aizawl FC leh Chawnpui FC an chak

I Day Football inelna chu nimin khan Lammualah khelh ṭan a ni a, I League club Aizawl FC chuan MPL club thar FC Bethle-hem chu 4-2 in an hneh. Group A inkhel hnuhnung zawkah Chawnpui FC-in FC Venghnuai 2-1 in an hneh ve bawk.

Aizawl FC tan Jacob Lalhlimpuia, MS Dawngliana, Jeremy Laldinpuia leh KC Larchhuakmawia ten goal khat ṭheuh an khung a, FC Bethlehem tan Moses Lalrinzuala leh Hmingthanmawia ten an khung ve bawk. Chawnpuiin Danny Zorammawia leh Lalnunsanga te hmangin 2-0 in an hma an hruai a, FC Venghnuaiin Lalrammuanpuia hmangin siphurh sut ṭhen mah se coach Lalsangzuala Hmar hote an ṭang tluan.

AFC nge nge
Tun season MPL-ah state pawn player leh foreigner a lak theih dawn lo a, I Day Football-ah pawh Mizo hlangin team tin an nilan vek dawn. Aizawl FC-in foreigner an kawl tawh bik loh avangin chak loh avangin an ṭha bik tiha sawi an har tawh a, chutihrualin FC Bethlehem lakah erawh team ṭha zawk an ni tih an pholang.

I League club hian goal li ngawt an khung a, an goal bawh pawh a na zawk. Amaehrawhchu vanduai ṭum chu ni se Aizawl FC hi point hloh thei dinhmunah an ding a, 2-1 a nih laiin goalline aṭangin defender-in a a dang a, box chhungah FCB winger Lalrintluanga titlu mah se referee-in penalty a pe lo bawk.

Aizawl FC-in tlarhnung an siamṭhat a ṭul a, chutihrualin tlarhma lam pawh thuam chak an la mamawh. FC Bethlehem-in MPL club an nih hnua an match hmasa berah Aizawl FC an hneh lo a, hnualna tur erawh a awm lo - Aizawl FC nen goal zawnah vawi ruk ve ve an pet. FCB-in point an hloh chhan erawh an tlarhnung pawp vang a ni a, semifinal luh an duh a nih chuan siam ṭhat ran mamawh.

Coach Sanga hote
Chawnpui FC-in coach Lalsangzuala Hmar hnuaia an match hmasa berah FC Venghnuai 2-1 in an hneh a, an player pawimawh Lalsawmzela leh Laltlanzova (Zozoa) te tel loa an khelh avangin an result neihah hian an lawm lehzual ang.

Chutihrualin Chawnpui leh Venghnuai te an inthlau lo a, a vannei zawk an chakah a ngaih theih. Ruahsur vangin Venghnuaiin an duh angin bul an ṭan thei lo a, inkhel tawp lama ruahsur ban hnuah erawh coach Lalrindika Hmar naute khel a hmuhnawm sawt. Group A-ah AFC leh Chawnpui ten point thum an hmu a, Bethlehem leh Venghnuai ten point la hmu lo mah se semifinal lut tur erawh hriatthiam a la har hle.

I Day Football 2022 Thlirna Tawi
Group inṭhen dan
Group A: Aizawl FC, Chawnpui FC, FC Bethlehem,
FC Venghnuai
Group B: Electric Veng FC, Chanmari FC, Chhinga Veng FC, Mizoram Police FC

Fixtures
Group Stage
Lammual - August 1, Thawhṭanni
FC Bethlehem 2 - 4 Aizawl FC
FCB: Moses Lalrinzuala 37'; Hmingthanmawia 81'
AFC: Jacob Lalhlimpuia 20' , MS Dawngliana 29', Jeremy Laldinpuia 67', KC Larchhuakmawia 77'
FC Venghnuai 1 - 2 Chawnpui FC
FCV: Lalrammuanpuia 78' (P)
CHFC: Danny Zorammawia 36'; Lalnunsanga 67'
Lammual - August 2, Thawhlehni
Chanmari FC 12:00 Noon Electric Veng FC
Chhinga Veng FC 2:30 PM Mizoram Police FC
Lammual - August 4, Ningani
FC Venghnuai 12:00 Noon FC Bethlehem
Chawnpui FC 2:30 PM Aizawl FC
Lammual - August 6, Inrinni
Chhinga Veng FC 12:00 Noon Chanmari FC
Mizoram Police FC 2:30 PM Electric Veng FC
RG Stadium - August 8, Thawhṭanni
FC Bethlehem 11:00 AM Chawnpui FC
Aizawl FC 1:00 PM FC Venghnuai
Lammual - August 9, Thawhlehni
Chanmari FC 12:00 Noon Mizoram Police FC
Electric Veng 2:30 PM Chhinga Veng FC