Europe roreltu England hmeichhia

UEFA European Women's Football Championship 2022 chu khelh zawh a ni ta a, England hmeichhe team aia thiam zawk an awm lo - Pathianni zan khan final-ah Germany chu 2-1 in an hneh a, Europe-a hmeichhe inkhelh thiam ber an ni.

England tan Manchester United forward Ella Toone chuan minute 62-naah goal hmahruai a khung a, Bayern Munich midfielder Lina Magull chuan hun tawp nan minute 11 chauh a awm tawh tihah Germany tan a sut.

Wembley Stadium-a inkhel entu mipui 87,192 hmaah team pahnihin minute 90 chhungin goal dang an khung thei tawh lo a, extra time khelh zui a ni.

Penalty hmangin champion tur chinfel ngei a ngai dawn niin a lang hman a, mahse, England an beidawng lo - anmahni ṭantu mipui ṭhahnem tak hmaah Manchester City striker Chloe Kelly chuan minute 110-naah chakna goal a khung a, thawm rinzia chu thua sawifiah chi a ni lo.

England tana chakna goal khungtu Kelly hian May 2021 khan a khupah hliam na tak a tuar a, rei tak chhung chu inkhel loin a chawl - a rawn kir leh hnuah England tan Euro a khel a, champion-na goal hial a khung ta.

World Cup 1966-a an champion hnuah England mipa emaw hmeichhe team-in nomawi lian tham an chawi leh tawh a, Wembley Stadium-ah ngei an hmeichhe team-in European champion dinhmun an luah leh ta - English media an tui rei leh khawp ang!

England boss Sarina Wiegman a ropui - Dutch coach hi Euro-a ram pahnih a zawna champion pui thei hmasa ber a ni a, kum 2017 khan an ram Netherlands chu champion nomawi a lo chawipui tawh.

Player a nih laia Netherlands tana vawi 99 inlan thei Wiegman hian an ram hmeichhe team hi kum 2019 khan World Cup final a lo hruai thleng tawh bawk a, September 2021 aṭang khan England hi enkawl ṭanin, tunah chuan Euro champion a nihpui leh ta der - a record hi a ropui takzet.

UEFA Women's Euro 2022 Final
England 2 - 1 (a.e.t.) Germany

ENG: Ella Toone 62'; Chloe Kelly 110'

GER: Lina Magull 79'