Messi leh Neymar-ten goal an khung

French football-a season bul ṭanna, Trophee des Champions-ah chiang takin Paris St-Germain an chak a, Nantes chu 4-0 ngawtin an sawp.

PSG tan Lionel Messi chuan season duhawm tak hman a tum tih pholangin, minute 22-na lekah goal hmahruai a khung a, Barcelona-a a khelhpui ṭhin leh a ṭhianpa Neymar-a siamsak a ni - tun hnaia player pahnih inkawp hi a hmuhnawm ṭhin a, Barca tana an vanglai hriatchhuah a awl hle.

Brazilian forward Neymar hian tun hnaiah sawiselna nasa tak tawk mah se, a la thiam reng tih pholangin, freekick hmangin an goal hnihna a khung a, minute 82-naa penalty a chhuih luh pawh ama thawhchhuah tho a ni.

Jean-Charles Castelletto chuan Neymar a titlu a, Brazilian forward hian goal khung nan a hmang - Neymar-a goal khung karah hian Sergio Ramos chuan goal a khung ve bawk a, Real Madrid captain hlui hian backheel hmangin a khung.

French Ligue 1 champion leh French Cup champion-in an khelh ṭhin Trophee des Champions hi Tel Aviv, Israel-ah khelh a ni a, a hmunah mipui 28,000 bawr velin inkhel hi an en.

Ligue 1 champion PSG hian August 6, zan dar 12:30-ah league season an ṭan dawn a, Clermont Foot nen an inkhel ang.

Trophees des Champions
Paris Saint-Germain 4 - 0 Nantes

PSG: Lionel Messi 22'; Neymar 45+5', 82' (P); Sergio Ramos 57'