United tan Ronaldo a inlan

Manchester United chhuahsan diltu Cristiano Ronaldo chuan a sawi lawk ang ngeiin Pathianni zan khan Red Devils tan pre-season match a khel a, a haw hma bawk!

Old Trafford-ah United hian Rayo Vallecano an mikhual a, an mikhual team nen hian 1-1 in an inhnehtawk. Red Devils tan Amad Diallo chuan minute 48-naah goal hmahruai a khung a, Spanish club tan Alvaro Garcia chuan si phurh sutin, hun tawp thleng goal dang a lut tawh lo.

Minute 45-naah Ronaldo hi lakchhuah a ni a, kum 37 mi striker hi khelmual a luh dawnin fans ṭhenkhatin au el mah se, lawm taka lo lawmtu pawh an awm nual tho.

Mimal harsatna chhuanlama Thailand leh Australia-a pre-season tour pawh hmang ve lo Ronaldo hian Donny van de Beek-a siamsak aṭangin chance nei mah se, goal-ah a chantir thei lo.

Second half-ah Ronaldo a inlan tawh lo a, he inkhela inlan ve lo, Portugal tana a khelhpui Diogo Dalot nen midang zawng aiin an haw hma a, Ronaldo hi a ṭhiante ruala a haw loh chhan he thu buatsaih a nih lai hian hriat a la ni lo - chhuah a la duh reng a ni mai thei.

United tan hian nipui transfer-a an lakluh Christian Eriksen leh Lisandro Martinez te an inlan a, minute 61-naah player pahnih hi lakchhuah ve ve an ni.

United tana inlante: Heaton; Laird, Martinez (Bailly, 61), Varane, Telles; van de Beek, Garner (Iqbal, 74); Chong (Hansen, 85), Eriksen (Mejbri, 61), Garnacho (Shoretire, 73); Ronaldo (Amad, 45).