Kan chhungkua leh Mizoram ka ngaihtuah a, ka mittui a tla - Jeremy Lalrinnunga

Jeremy Lalrinnunga'n Commonwealth Games gold medal a la a, khawvel hmuha Mizoram a chawimawi lai hian a chawrchhuahna hmun a hre reng - amah ṭan em emtu Mizo mipuite avangin a hnuk a ulh tih Vanglaini a hrilh.

Inelna neih laiin Jeremy hi a tlu, clean & jerk a chawi hmasak berah a tlusual - vawi hnih chawi tur la awm chu a chawi thei lo mai ang tih a hlauhawm hman hle. Mahse, huaisen takin a rawn ding chhuak a, a ram India tan gold medal a la.

Jeremy-a chuan, "Ka tluk khan hrehawm ka ti hle, a rukin ka mittui a tla. Kan chhungkua leh min ṭantute ka ngaihtuah a, ka lakah beiseina sang tak an nei tih ka hria. An duh ang medal ka laksak thei dawn lo niin ka hre hman a, ka rilru a hrehawm hman hle.

"Mahse, hun harsa ka tawh chiah khan Pathian ropuizia a takin ka hmu, bang loa min ṭawngṭai pui ṭhintute ṭawngṭaina chu chhanin a awm," tiin Vanglaini a hrilh a, inelna sang leh boruak sang takah Mizo mipuite thlawpna chuan kawngro a su hle.

Hello Mizoram
Naupangtê a nih laiin Mizoram a chhuahsan a, weightlifting a luhchilh avangin Mizoram lamah a rawn haw tam lo. A hun awl neih leh remchangah erawh a rawn chuang chhuak ziah, tun Commonwealth Games zawhah pawh rawn haw ngei a tum.

Jeremy-a hringtu, a nu Lalmuanpuii chuan, "Ruahman dan chuan August 5 hian England aṭangin an lo haw ang. India ram an lo thlen hunah official a hun hman tur a nei nual a, phai lamah ni hnih vel a chawlh hnuah Mizoramah rawn haw a tum.

"Hripui leng leh inelna tura a inbuatsaih avang hian kum 2020 hnu lamah a lo la haw leh lo. Kan beisei dan chuan August 10 vel bawrah a lo haw thlen theih kan beisei a, inelna dang hmachawn tur a awm leh dawn avangin chawlh erawh a nei rei lo," tiin Vanglaini a hrilh.

Beiseina nen Paris
Commonwealth Games gold medal a lak hnuah, Mizo tlangval Jeremy chuan, "Hlawhtlinna min petu Pathian chungah ka lawm. Hmabak hlen tur tam tak ka la nei. Tuna ka hmachhawp zingah chuan Paris Olympic hi a lian ber," tiin a sawi.

International Olympic Committee tarlan dan chuan, tun dinhmunah mipa weightlifting huangah hian 61kg, 73kg, 89kg, 102kg, +102kg te a ni dawn. Tuna Jeremy-a khelhna category hi Paris Olympic atan chuan a awm lo, tun hma lama a khelhna weight a thlak angin a tih danglam leh a ngai dawn.

Jeremy-a nu Muanpuii chuan, "Intih zan chuan weight paih tur a tam lutuk a, a tan a harsa ang. Chuvangin thutlukna chu la siam fel chiah lo mah se, tuna a lan dan chuan a kg a tih tam kan ring, a tan pawh a awlsam zawk kan beisei," tiin Vanglaini a hrilh.

I tê ber tawp lo e!
Mizo boxer Lalneihtluanga leh Lalmuanpuii te fapa Jeremy Lalrinnunga hi Mizo naupang dangte ang bawkin a tette aṭangin infiamna a ngaina nghal a, apa tuina boxing khel turin a ṭhiante a zui ve ṭhin. Mahse, a pumrua a lian tawk lo a, a tet bik avang hian boxing an khelhna sirah an ṭhut tir zawk hlauh ṭhin. Boxing ring chhungah a tan hmun a awm lo a, infiam ve a duh ṭhin avangin kawng dang a dap a ngai.

Kum 2011 September 24 khan Ainawn Vengah (Govt. Complex) Weightlifting Academy State Sports Coaching Centre an din a , he hmunah hian Weightlifting coach Malsawma Khiangte (SYS) kaihhruaina hnuaiah Jeremy hian a zinkawng bul a ṭan.

Kum 2012 April 9-13 chhung khan SAI chuan Army Boys, Pune-a lut tur zawnna a nei a, he hunah hian Mizo naupang panga an inlan - an zing aṭang hian pathum Jeremy, Jacob Vanlaltuanga leh Zakhuma te an tling.
Zirna hmun ṭha leh changtlung zawk a zawm hnuah Jeremy hian hnung lam a hawi tawh lo. Pune-ah hian Slovakian coach ṭha Gubala leh assistant coach Zarzokima chuan weightlifter ropui ni tur hian an lo chher hriam lehzual ta a ni.

Harsatna karah...
Ṭhianho zinga ṭha ber nih a awlsam lo a, mahni chenna veng leh khua aiawhtu nih pawh thil harsa tak a ni. Mipui tluklehdingawn chuang chenna India aiawh nih phei chu a awlsam loh zia sawifiah thiam a harsa zawk hle. Jeremy erawh India aiawhin a tel satliah lo, Commonwealth Games champion a ni.

Indian Weightlifting Federation-in ram aiawh tura a thlan Jeremy Lalrinnunga hian awlsam takin hlawhtlinna a chang mai bik lo, kum 10 vel bawrah training nei turin an chenna in lum a chhuahsan a ngai a, nu leh pa tel loin hnam dang karah hun a hmang.

Jeremy hringtu Lalmuanpuii chuan, "Naupangte a nih lai aṭangin a tum a ruh em em a, natna leh harsatna a neih pawh hian kan ngaihtuah lutuk a hlauh avangin a sawi duh ngai lo, a theih ang angin amaha chinfel hi a lo tum ve ṭhin a ni," a ti.

State level intihsiakna lamah Jeremy hi a inlan lo a, inelna puitling a hmachhawn hmasak chu Youth National Weightlifting Championship 2016 kha a ni. Hemi ṭum hian inlan thei lo tura ngaih a ni a, mahse a awma hliam hmun riat zeta an chilh a dam aṭanga thla khat hnu lekah inelna a hmachhawn zui a ni.

Jeremy chuan, "Ka ṭhianpa nen kan infiamna lamah ka awmah mi ti palh a, hmun riatah chilh a ni. Kan hotuten hliam nei chungin inelna hmachhawn an phal lo. Ka hliam dam hnuah thla khat vel chiah training-na hun ka nei zui a, medal hmasa ber ka la thei kha ka vannei hle a ni," tiin Vanglaini a lo hrilh tawh.

Jeremy Lalrinnunga Commonwealth Games-ah India ram leh Mizoram tan gold medal i lak leh, record thar i siam hi ka va chhuang tak che em. Zofaten talent kan neih ṭhat zia i rawn pho lang chiang hle mai.
- Lallianṭhuama (Sentea), President Mizoram Weightlifting Association

Mizo fate zingah Commonwealth
Games-ah Gold medal i la thei hmasa ber i ni hi kan va chhuang tak che em. Jeremy Lalrinnunga Grassroot coach ka nih angin Pathian chungah ka va lawm tak em.
- Malsawma Khiangte,
Weightlifting Coach (SYS)

Mizoram Football Association chuan Commonwealth Games 2022 neih meka weightlifting-a gold medal latu Jeremy Lalrinnunga, Ainawn Veng (Govt. Complex), Aizawl chu a lawmpuiin a chhuang takzet a ni. MFA chuan chhuanawm a tiin Mizo zinga Commonwealth Games-a gold medal la hmasa ber a ni hi ropui a ti takzet a ni. MFA chuan Jeremy Lalrinnunga hi Mizo infiammi dangte entawntlak ni zel tur leh, hlawhtlinna sang zawk chang ngei turin duhsakna sang ber a hlan a ni.
- Mizoram Football Association

Mizoram Badminton Association (MBA) chuan Commonwealth Games 2022, Birmingham, United Kingdom-a neih mekah India tana chawimawina sang ber tangkapui (Gold medal) hlawhchhuaka, India leh Mizo mipui te khawvel hriata pho chhuaka chawimawitu, Jeremy Lalrinnunga, Ainawn Veng (Govt. Complex) Aizawl chu a lawmpuiin a chhuang tak zet a ni.
- Mizoram Badminton Association

Mizoram Table Tennis Association (MTTA) chuan, kumin 2022 Commonwealth Games Birmingham, UK-a India ram tana Gold Medal latu leh NWG record siamtu, khawvel hriata Mizo min chawimawitu Mizo tlangval Jeremy Lalrinnunga hi kan chhuang takzet a, a hlawhtlinna kan lawmpui em em a ni.
- Mizoram Table Tennis Association

Mizoram Basketball Association chuan 2022 Commonwealth Games-a gold medal latu leh, record thar siamtu ni bawk Jeremy Lalrinnunga hi kan lawmpui a, a kal lehzelna turah pawh hlawhtlinna chang zel turin duhsakna kan hlan.
- Mizoram Basketball Association

Cricket Association of Mizoram chuan 2022 Commonwealth Games neih laia gold medal latu leh record siamtu ni bawk Jeremy Lalrinnunga a lawmpui. Hlawhtlinna lian zawk chang chhunzawm turin duhsakna a hlan bawk.
- Cricket Association of Mizoram