Max Verstappen a tlan fal zel

Formual 1 champion lai Max Verstappen chu fal takin a tlan zel. Pathiannia tlan zawh tak Hungarian Grand Prix-ah Verstappen hian hnehna a chang a, a hnungah hian season hmasa lama a elpui hautak ber Lewis Hamilton a awm.

Red Bull driver hian hmanni lawk khan French Grand Prix-ah hnehna a chang tawh a, a boruak fuh vanglai takin Hungaroring tlankawngah a lut, tun hma intlansiak vawi 10 a hmachhawn tawha a la chak miah lohna hmunah hnehna a chang ta a ni.

F1 hi rei vak lo an chawl lailawk dawn. Season chawhnu lam bul ṭan nan August 28, Pathianniah Belgian Grand Prix an tlan leh ang; tun ṭuma an chawlh chhung hi team leh driver tan insiamṭhatna hun remchang a ni ang.

A fal ta
Season hmasa khan Max leh Hamilton an in um tawk a, tun season tir lamah Ferrari driver Charles Leclerc a che ṭha bawk. Kum dang zawng aiin champion tuma inelna a sang tura ngaih a ni, mahse season chanve an hman zawh meuh chuan Verstappen a fal nalh.

Kuminah vawi riat ngawt hnehna a chang tling ta, amah hnaih bertu Leclerc chu vawi thum chauh a la chak. Dutch tlangval hian point 80 zetin hma a hruai fal ta a, a chesual viau a nih ngawt loh chuan champion nomawi a kawl lai a humhim a rinawm.

Kum 24 mi Verstappen chuan, "Tlankawng a zirin motor tyre kan hman thlak a ngaih chang a awm, tun ṭumah pawh khan a tira kan ruahman ang chuan hard tyre hman kan tum a, mahse a takah chuan soft tyre kan hmang ta zawk," tiin an chakna thuruk a sawi.

Lewis a harh
F1 champion vawi sarih ni tawh Hamilton-a'n kuminah chak ni hmel a la hmu lo, pakhatna la ni lo mah se Mercedes driver hian tun hnaiah hma a sawn nasa, tun ṭumah pawh hian Max a phak lohna hi 7.8 second chauh a ni, an inkar a zim takzet.

Mercedes team boss Toto Wolff chuan, "A fuh lo chu kan siamṭha zel a, tunah chuan a ṭha ber ni turin kawng dik kan zawh mek," tiin a sawi a, season tir lama an chet fuh tawk lohna chu season chawhnu lamah khuh theih ngei an beisei thu a sawi bawk.

Britain tlangval Hamilton chuan, "Intlan-siak kha ngun takin en let ila, kan team driver pahnih kha a hmasa ber leh dawt chiaha thleng thei kan ni. Vanneihna kan mamawh a, chumi tawng baw tur chuan kan thawkrim chhunzawm bawk ang," a ti.

Beiseina thamral?
Leclerc hian theihna a nei a, a theihna tisang zual turin Ferrari team tan a tlan bawk. Italian team hian car an nei chak ber tia sawi ngam a ni a, amaherawhchu an duh leh beisei ang erawh chuan season an hmang lo.

Team leh driver-in tihsual an nei fo a, chu bakah Red Bull driver Max an elphak ngai meuh lo. Hungarian Grand Prix-ah parukna a ni phak hram a, a tan chuan Verstappen hi umphak theih la ni mah se a harsa tawh mai thei.

Ferrari driver Leclerc chuan, "Tun hnai season hnih kan thlir a nih chuan, driver leh team hian nasa takin hma kan sawn. Kawng lehlam aṭanga thlir erawh chuan a chung bera awm tur kan ni thung, chumi tur chuan theihtawp ka chhuah ang," a ti.