Copa America-ah Brazil champion

South American football-a hmeichhe inelna sang ber Copa America Femenina-ah Brazil hmeichhe team an champion a, final-ah inelna thlengtu Colombia chu 1-0 in an hneh - inkhela goal awmchhun hi Debinha khung a ni.

Estadio Alfonso Lopez, Bucaramanga-ah final hmuhnawm beiseiin mipui 28,000 an pungkhawm a, minute 39-naah Brazil fan-ten lawmna tur an nei nghal.

US club North Carolina Courage tana khel Debinha chu Colombia defender Manuela Vanegas chuan a titlu a, penalty a chawi. Kum 30 mi Debinha hian harsatna nei loin goal-ah a chantir a, goal dang a lut zui lo.

Brazil final kalkawng thlirin champion an phu hle - match ruk an khelhah goal 20 ngawt an khung a, an lamah a lut miah lo! Brazil hmeichhe team hian an champion avangin dollar maktaduai 1.5 an dawng a, pahnihna Colombia hian $500,000 an dawng thung.

Copa America Femenina hi nakkuma khelh tur hmeichhe World Cup atan qualifier anga chhiar tel a ni nghal a, he inelnaa a sang pathum chu World Cup khel tur hian an tling.

Brazil leh Colombia chu World Cup khel turin an tling tihna a ni a, third place match-a 3-1 a Paraguay hnehtu Argentina chu World Cup khel tur hian an tling chiang ve bawk a ni.

Hei chauh a ni lo - Paris Olympics 2024-a hmeichhe football khel turin finalist Brazil leh Colombia hi an tling nghal bawk.

Brazil champion theih nana pawimawh coach Pia Sundhage hi lam hmaih theih a ni lo - hmeichhe coach zinga Copa America Femenina-a champion nomawi chawi hmasa ber a ni.

Kum 62 mi coach hian US hmeichhe team chu Olympic-ah gold medal vawi hnih a lo hlawhchhuahpui tawh a, World Cup-ah final a thlenpui tawh a, an ram Sweden chu Olympic-ah silver medal a lo hlawhchhuahpui tawh bawk - a record hi a ropui tham hle.