Forest-in Mangala an lalut

Nottingham Forest-in insum an tum lo - nipui transfer-a an player lakluh 12-na ni turin Orel Mangala chu VfB Stuttgart aṭangin an lalut a, kar hmasa lama inremna an lo neihpui tawh nia sawi Mangala contract rei zawng hi 'hun rei tak chhung atan' ti baka tarlan a ni lem lo.

Belgian midfielder Mangala man zatah Forest hian pound maktaduai 12.7 an inseng nia sawi a ni bawk a, nipui transfer-ah pound maktaduai 90 dawn an seng tawh a, Premier League kai thar club hi an che na hle.

Kum 24 mi Mangala hian season hman zawh takah khan Stuttgart tan inelna hrang hrangah match 29 khelin goal khat a khung a, assist vawi li a nei bawk.

Hamburger SV (2018-19) tan loan-a a khel tawh tih loh, club dang tana la khel ngai lo Mangala hi age level hrang hrangah Belgium tan lo inlan tawhin, March thla khan Belgium senior team tana a match hmasa ber a khel a, match hnih a khel tawh.

Forest hian nipui transfer-a player langsar an lakluh zingah, English attacking midfielder Jesse Lingard chu rimtu tam tak a nei chungin an thlem lut thei a, Manchester United aṭangin keeper Dean Henderson chu loan hmangin an hawh bawk.

Nigeria international Taiwo Awoniyi chu an player man to ber ni turin pound maktaduai 17 bawr velin an lalut a, Liverpool-a hmun la chang chho mai tura ngaih Neco Williams chu an lalut thei bawk - an season hmasa berah tih mai mai an tum lo.