Arsenal tan Next Season chu le...

Premier League a hnai, a rim kan hre phak tawh - Zirtawpni zanah khelh ṭan a ni dawn. Pre season an hman dan aṭanga chhut chuan Arsenal tan inelna ṭan a chakawm tawh, fans lamin an pawlte inkhel en an châk tawh takzet.

Mahse, inelna tak an hma-chhawn ang a, coach Mikel Arteta naute hi eng ang tak nge an nih leh ang tih erawh hunin a rawn hril ang. Hman aṭanga an sawi ṭhin 'Next Season' chu tun hun hi a ni thei dawn em tih kan hre thuai dawn.

Nikum kha
"Palina an ni phak dawn emaw an tia, Champions League an mitthla nasa tawh hle - mahse pangana ni chungin season an khar," hei hi season hmasa Arsenal dinhmun a ni, a bul an ṭhat chhiatna lak aṭanga an thawh leh dan erawh ngaihnawm tak a ni thung.

An hmelma Tottenham hnuaia season an khar chhan hi an ngaihtuah nasa hle ang. August thlaa an tlawm vek mai te, hun pawimawh laia an tawlhthlu leh captain Pierre-Emerick Aubameyang an chhawr mumal lo te chu a chhan ṭhenkhat zinga pakhat a ni.

Arsenal tana goal khung hnem ber chu Bukayo Saka a ni a, ani hian goal 11 a khung - a hnuai chiahah goal 10 khungtu Emile Smith Rowe leh Gabriel Martinelli te an awm bawk. An tlarhma goal khung tamte khung zat hi a tam lo hle.

Premier League lama an elpui dangte chhut ila, an hmatawng ṭha ber leh an kawppuite chuan goal 20 vel bawr an khung thei. Arteta naute erawh goal 10 vel bawrah an tawp, goal khung a harsat miau chuan point hmuh pawh a harsa.

Jesus a lo lang
Arsenal hian an ṭhat tawk lohna lai an hria, striker Gabriel Jesus chu Manchester City aṭangin an lei - inbuatsaihna hun a ṭhat theih nan hma takah an lei fel. Brazil international hian Man City tan season khatah league goal 15 khung tlin a nei ngai lo.

A goal khung tawh dan thlirin Gunners mamawh chhanna a ni dawn em tih chu chhut fe tham a ni. Chutih rualin Etihad Stadium-ah khan Pep Guardiola-a'n striker ṭha Sergio Aguero a nei a, a chhuah hnuah Jesus hi tlarhma lai leh sirah a chhawr kual bawk.

Khelmual chhungah hun a hmang tam tawk lo, a hman chhunah erawh a khel chhe ngai lem lo - season hmasa an champion theih nana player pawimawh berte zinga mi a ni phak a, a mamawh chu khelmual chhunga hun hman tam a ni.

Arteta-a'n Jesus hi a hrechiang a, a chungah rinna a nghat ngam. Pre season an hman chinah ngawt pawh Jesus hian match nga aṭangin goal sarih a khung. Inrintawkna sang tak nen season bul a ṭan dawn, goal 20 bawr a khung thei a nih chuan an lei chhan a ti hlawhtling a ni ang.

Captain Odegaard
Martin Odegaard chu captain nghet atan ruat a ni, kum 23 mi chauh la ni mah se Real Madrid midfielder hlui hi an ram Norway tan pawha captain ni phak a ni a, hun rei tak chhung duhthusam captain an neih loh hnua an beiseina a ni leh mek.

Norway international hian season hmasa khan league goal sarih a khung, tun season-ah chuan mawhphurhna sang zawk nen a inlan dawn a, goal leh assist pawh a neih tam zawk a beisei awm. Set piece a pet tam chuan a ṭangkaina zual ngei ang.

Odegaard hi Hale End chhuak Saka leh Smith Rowe ten a sir lamah an thlawp thei dawn a, ball thiam leh huaisen Martinelli a awm bawk. A hnung lamah a kaihza veng turin Xhaka leh Thomas Partey an inkawp ang - zalen takin tlarhma lam a pui thei dawn.

Rawlthar beisei awm berte zinga mi ni ṭhin kha Real Madrid-ah a vul ta si lo a, Arsenal khai ding turin a thiamna te chu a lo sangin a ṭha tawk reng em tih fiah a ni dawn, khelmual chhungah chuan a kum naupan anga teh ngawt chi chu a ni lo ang.

Goal venhim
William Saliba hi i hriatna a rei tawh ang, mahse kum 21 mi chauh a la ni. 6feet 4in a sang defender hian nikum khan pre season a hmang mumal lo a, coach Arteta mit a tlung tawk lo, kuminah erawh inbuatsaihna a nei ṭha - hmun pawimawh a chan tawh a rinawm.

Spanish manager Arteta-a'n tlarhnung laiah Gabriel, Saliba leh Ben White te a nei a, a ṭul a nih chuan tlarhnung laiah pathum dahin wing back pahnih a chhawr thei tawh ang. English defender White hi a sir lamah a nawr thlak theih bawk.

Season hmasa tawp lamah an buaina lian tak chu tlarhnung sir a ni. Kieran Tierney leh Takehiro Tomiyasu an hliam laiin an hmunruak luah thei an awm lo. Tunah erawh Oleksandr Zinchenko an nei tawh a, hliam vanga buai fo Tierney tan khelh phak reng a harsa tawh hial ang.

Japan international Tomi-yasu hi season tir lamah a inlan thei lo a nih pawhin, an match hnuhnung bera Sevilla an sawp ṭum ang khan mual dinglam sirah White a awm thei a, kum 27 mi Hector Bellerín pawh inkhel turin a inpeih.