Brighton-in City dilna an hnawl, Chelsea an inlar

Premier League club tenau zinga mi Brighton and Hove Albion chuan Marc Cucurella chungchangah English club lian zinga mi Manchester City lei dilna an hnawl. Spanish defender Cucurella hian club hruaitute bulah chhuah dilna a thehluh avangin a chhuah tho a rinawm a, a chhuahna tur erawh Etihad Stadium ni loin Stamford Bridge zawk a nih rinawm.

Premier League champion Man City hian Arsenal-ah Oleksandr Zinchenko an chhuahtir avangin Ukrainian player thlakna tur an mamawh a, Cucurella hi duh tho mah se Seagulls chhiarna zat erawh a uchuak hretah an ngai.

Man City hian Cucurella manah hian pound maktaduai 30 an theh chhuak a, Seagulls-in an hnawl avangin a vawi hnih nan kar liam ta Zirtawpni khan pound maktaduai 40 an thehchhuak leh. Amaherawhchu Seagulls hian pound maktaduai 50 aia tlawma hralh an tum loh avangin Man City-in Zinchenko thlak nan player dang melh zawk an tum.

Brighton hian tun nipuiah midfielder Yves Bissouma chu Tottenham hnenah pound maktaduai 25-in an hralh tawh a, an sum dinhmun a ṭhat tawk avangin inhralh leh kher an mamawh tawh lo.

Cucurella hian August 2021 khan pound maktaduai 15-in Getafe aṭangin an lalut a, kum 2026 thleng daih contract a la neih avangin Seagulls hian Man City ngamna zat aia tama an hralh theih an inring hle.

Seagulls hian Cucurella manah hian pound maktaduai 50 an beisei a, Chelsea an rawn inlar avangin an hralh theih ngei pawh a rinawm. Nimin khan Blues leh Cucurella hi mimal contract chungchangah chuan an inrem niin an sawi a, a man chungchangah club pahnih hi nimin vek khan an inbia a, he thu i chhiar meuh chuan inremna an nei tawh hial ang.

Cucurella hi Barcelona academy chhuak a ni a, Barca tana khelhna hmun a chan theih loh avangin loan-a a khelhna Getafe-ah a nghetin a lut a, season liam ta khan English club hi a zawm. Brighton tan hian Cucurella hian match 38 a khelhsak a, goal khat a khung.