Sum nei lo Leicester; player lakluh an la nei lo!

Premier League nipui transfer-ah Leicester City an la bazar ve lo a, Foxes manager Brendan Rodgers chuan player lakluh an la neih loh chhan chu sum an neih loh vang a nih thu a sawi!

Rodgers chuan, "Season tawp lamah khan kan sum dinhmun ka hrechiang a, fimkhur taka kal a ngai tih ka hria a, a harsa em em a ni. He club hian sum nei lo chunga insen a tum dawn lo a, hei hi he club ngelngheh chhan pawh a ni," a ti.

Foxes boss Rodgers-a thusawi aṭang chuan sum hman tur an nei lo a, nipui transfer-ah Leicester hi an bazar a rinawm lo - hetiang boruak karah hian an player ṭha ṭhenkhat club dangin an lo rim ve reng bawk a, Rodgers-a lu a hai khawp ang!

Tun dinhmuna Leicester player zingah midfielder Youri Tielemans, centre back Wesley Fofana leh playmaker James Maddison te chu club dang nena sawizawm hlawh mek an ni a, an hma hun a chiang lo.

Cham rih la
Youri Tielemans chu Arsenal nen sawizawm mek a ni a, mahse, he thu buatsaih a nih thleng hi chuan Belgian midfielder hian official taka dawrtu a tawng rih lo - a cham chance a sang.

Kum 25 mi midfielder hian kum 2019 khan Monaco aṭangin Leicester hi pound maktaduai 40-in a zawm a, Foxes player man to ber record a siam - an hralh dawn a nih pawhin tlawm tak chuan an chhuahtir lo ang.

Rodgers chuan an club-a kum khat contract la nei mek chungchang hi sawiin, "Contract thar a la ziak rih lo a, mahse, hei hian club tana a inpekna a nghawng phah chuang lo.

"Contract thar ziak tura dawrna chu a agent kutah rei tak a awm tawh a, chu chu kan dinhmun a ni rih," a ti a, Tielemans hian contract thar a ziak lo a, tun nipuiah an chhuah lo bawk a nih chuan a thlawna chân theihna a awm.

Fofana chelh duh
Chelsea leh Paris St-Germain ten Fofana lakluh an duh nia sawi a ni a, mahse, Rodgers chuan French centre back hi zawrh lai a nih loh thu a sawi - hralh a tum lo hle.

Kum 49 mi Rodgers chuan, "Fofana hi hralh kan duh lo a, contract thar a ziahna pawh a la rei lo. Khawvela defender ṭha ber pawl a la ni dawn a, nakinah chuan chhuahna hun ṭha zawk chu a la nei ang.

"Mahse, tunah chuan chhuahtir kan tum lo a, ani ang player chân hi kan duh lo," a ti - kum 21 mi defender hian October 2020 khan £36.5mtd-in Foxes hi Saint-Étienne aṭangin a zawm a, khatihlai khan Covid-19 vangin English football thlasik transfer chu October 2020 - February 2021 inkar hawn a ni.

Khawthlang media-te chuan Foxes hian Fofana hi an hralh dawn a nih chuan £85mtd tal dawn an inbeisei dawn niin an sawi a, mahse, Rodgers-a ṭawngkam aṭang chuan hralh an duh lo zawk niin a lang - March thla khan 2027 thleng cham turin contract a ziak bawk.

Maddison-a dinhmun
Foxes-in pawisa an nei lo a, hemi hretu pakhat chu Newcastle United an ni - Maddison lakluh tuma Foxes an dawrna hmasa £40mtd chu hnarsakin awm mah se an beidawng lo a, Leicester an dawr nawn.

Magpies hian £40mtd - £50mtd inkarin Leicester hi an dawr nawn nia sawi a ni a, player leina tur sum nei lo Foxes hian an pawm dawn em, he thu buatsaih a nih lai hian hriat a la ni lo.

Saudi PIF-in Magpies an lei hnuah, Newcastle hi transfer bazar-ah sum seng hnem viau tura ngaih an ni a, mahse, fullback Matt Targett (£15mtd), Burnley keeper Nick Pope (£10mtd) leh Lille centre back Sven Botman (£35mtd) tih loh chu nipui transfer-ah lakluh an la nei rih lo a ni.

Kum 25 mi Maddison hian Leicester-ah kum hnih châm turin contract a la nei a, St. James Park hi pan a duh kher lo ve thei - Magpies boss Eddie Howe chuan Reims striker Hugo Ekitike lakluh a tum a, mahse, PSG zawm a thlan zawk avangin Maddison lam hi a hawi.

Mangṭha Kasper?
Sum harsatna karah Leicester hi an keeper chhuanvawr Kasper Schmeichel chân thei dinhmunah an ding mek a, November-a kum 36 tling mai tawh tur keeper hian season khat bak King Power Stadium-ah contract a nei tawh lo.

Rodgers chuan, "Club leh Schmeichel aiawhten indawrna an kalpui mek a, a tan duhthlan tur a awm ngei ang tih kan chiang a, tunah chuan indawrna nghah rih hi kan tih theih chu a ni," a ti.

Foxes boss chuan, "Player, tu chungah pawh tun hun ang hi chu a thleng ṭhin a, lunglenthlak takin an kal mai ṭhin. Tun dinhmunah chuan club-a a sulhnu zawng zawng hi kan zah em em a, chuta ṭang chuan thutlukna kan siam ang chu," a ti.

Rodgers-a ṭawngkam aṭanga thlir chuan Foxes hian Kasper chân hi an pawi ti vak tawh lo niin a lang a, a kum a tam ve tawh bawk avangin contract thar a ziak lo a nih pawhin a mak lo ang.

Hmachhawp chu
Leicester-in sum hman tur an nei lo a, club hausa zawkten an player ṭhat an rim suau suau bawk - Foxes tan player ṭhate man to zawka hralh a, player man tlawm zawk hmanga thlak chu transfer bazar-a chet theih dan awmchhun a ni.

Chutihrual chuan Leicester hi Premier League club hausa kara team tawh khirh pawl ni ve reng thei an ni a, chumi hrilhfiahna awlsam chu Premier League (2015-16) leh FA Cup (2020-21) nomawi an chawi chu a ni.

English top flight league-a 'Big Six' te pawhin an tawn châk loh pawl an ni reng. Rodgers chuan, "Leicester hi club ropui tak a ni a, club neiute hian club lian zawk elpui hi an tum ve reng ṭhin a, keipawhin theihtawp chhuahin ka bei.

"Mahse, kuminah chuan vanduaithlak takin anni ho nena inel chu a harsa tawh mai thei. Thil inthlak chu awm thei mah se, kan sum dinhmun ka hriat khan kan neihsaah ka rilru ka sawr bing a, kan neih loh ka ngaihtuah lo. European football khel phak tura 'fight' chu kan tih theih tur niin ka hria," a ti a, nomawi a beisei ngam lo.