Ramsey-a'n Nice a zawm

Juventus-a a contract titawptu Aaron Ramsey chuan French club Nice chu free transfer-in a zawm a, a contract rei zawng erawh French club hian an tarlang lo.

Kum 31 mi Ramsey hian Juventus-ah season khat khel turin contract a la nei a, mahse, Italian club-ah khelhna hmun a chan loh avangin inhriatthiam tawnnain a contract hi tihtawp a ni.

Season hmasa tawp lama Rangers-a loan-a khel Ramsey hian Juve a chhuahsan hian zângnadawmna, euro maktaduai thum a dawng nia sawi a ni a, club thar a nei zui.

World Cup 2022-ah Wales an inlan dawn a, Ramsey hian an ram tan Qatar-ah inelna hmachhawn a duh - hei vang hian Nice a zawm a, a career chuai tawh lam chhem nun a inbeisei ang.

Juve tan match 69-a goal ruk leh assist vawi ruk neitu Ramsey club thar nice hi Borussia Dortmund boss hlui Lucien Favre enkawl an ni a, Manchester United defensive midfielder hlui Morgan Schneiderlin an nei bawk.