Barca zawmtu Kounde a buai lo

Chelsea nen rei tak sawi zawm a nih hnua Barcelona zawm thlangtu Jules Kounde chuan thutlukna siam tura a inngaihtuah rei loh thu a sawi a, Catalan club a zawm thei chu a lawm hle.

Kum 23 mi defender chuan, "Hmun dang aṭangin sawmna ka hmu ngei a, mahse, Barca leh Sevilla inrem hun kha ka nghak tawp. Barca zawmna chance a awm tih ka hriat khan Barca ka thlang nghal a, ka club zawm duhah ka chiang a ni," a ti.

French centre back Kounde hian pound maktaduai 42-in Barca hi a zawm a, kum nga chhung atan contract ziakin, £837mtd release clause a ziak tel.

Kounde chuan, "Ka hlimin ka inchhuang takzet. Club lian tak, tum ropui tak nei ka zawm a, keipawhin thil tum ka nei a ni," a ti a, Catalan club-ah hlawhtlin a tum.

Barca director of football Mateu Alemany chuan France tana vawi 11 inlan tawh Kounde aiawhte chuan inbiakna neih a nih laiin ni tin deuhthaw an biak thu a sawi a, "A tawpah chuan sawi tur ka hriat loh avangin Jonathan Kebe (Kounde agent) hnenah min be tawh rih lo turin ka hrilh tawp a ni," tiin a sawi.