Eriksen-a'n United manager pathum a be hman

Manchester United midfielder thar Christian Eriksen chuan Old Trafford pan tumin United nen indawrna an lo nei tawh ṭhin thu a sawi a, tun nipui transfer-a Red Devils a zawm hma khan coach pathum indawrna a neihpui hman!

Ajax, Tottenham Hotspur leh Inter Milan midfielder hlui hi United coach hlui Louis van Gaal, Jose Mourinho leh Ole Gunnar Solskjaer ten an dawr vek a, a tawpa hmin theitu erawh coach thar Erik ten Hag a ni.

Season hmasa tawp lama Brentford tana khel Eriksen hian Old Trafford-ah kum thum chhung atan contract a ziak a, Erik ten Hag chu United a zawm nan a pawimawh thu a sawi.

Eriksen chuan, "Man United-a coach lo ni tawhte nen khan kan indawr vek a, mahse, a la hun lo a ni ang. Spurs-ah hun rei tak ka awm tawh avang khan ram danga inkhelh leh kha ka châk a, Inter ka pan a, hun nuam tak ka hmang a ni," a ti.

Kum 30 mi Eriksen chuan sawi zawmin, "Mahse, ka rilrua ka lo suangtuahnate thlak dawrh khawpin ka chungah thil a thleng a, he hmuna inkhelh hi hmanni lawk kha chuan ka inring lo," a ti a, a rin lohna hmun a pan.

Eriksen hi nipui transfer-ah khan Brentford chuan chelh tum mah se chhuah a thlang a, Tottenham Hotspur hming ri mah se Eriksen chuan, "Kan inbia a ni mai a, awmze nei taka indawrna a awm lo," tiin Spurs a pan loh chhan a sawi bawk.

Denmark international chuan, "Manchester United nen inbiakna ṭha tak kan nei a, phone hmanga kan inbiak aṭang khan engkim a fuh nghal a, min duh ve tak tak nia ka hriat avangin inngaihtuah rei a ngai lo. Ten Hag-a awm vang a ni pakhat a, a football thlir dan leh a khelh duh dan hi ka duh dan nen a inmil a, Ajax-a ka hun hman ṭhin dan nen pawh a inmil a ni," a ti.

United hian Bruno Fernandes an neih sa avangin Eriksen hi engtiangin nge an chhawr ang, tih chu thil hriat châkawm a ni a, Rayo Vallecano nena friendly match an khelhah chuan Cristiano Ronaldo hnungah a awm - Bruno khelhna ṭhin a ni.

Eriksen chuan, "Bruno nen hian kan khel dun thei reng alawm - khawi hmunah pawh ka khel thei a, min dahna position-ah chuan insiamrem ka tum mai ṭhin. Pawn lam aṭanga thlir chuan, number 10 anga khelh chuan a laia awm chawt tur angin a lang mai thei a, mahse, chutiang chu a ni tawh lo. Eng position-ah pawh a chhia leh ṭha chu a awm vek a ni," a ti a, United tan inher rem a hreh lo.