Serie B khel tur Fabregas

Spanish midfielder Cesc Fabregas chuan uaithlak lam pan tawh mah se, inkhelh chawlhsan mai a la tum bik lo a, Italian club Como chu season hnih chhung khel turin a zawm.

Fabregas hian June thla khan French club AS Monaco-a a contract chu a hmang zo a, free transfer-in Serie B club Como hi a zawm - a career-a a vawi khat nan top flight league ni loah a khel dawn a ni.

Kum 35 mi Fabregas chuan, "Club ṭha tak taka ka khelh tawh avangin vannei ka inti a, Como pawh hi chung club ṭha zingah chuan a tel a ni. Khelmuala inlan a, he hmun mawi leh nuam taka fan-te hmaa khelh ka châk tawh hle," a ti.

Barcelona academy chhuak, Arsenal aṭanga a professional career ṭantu Fabregas chuan, "He club kalphung leh a neituten hmasawn an duhna hi entawn tlak a tling a, bul ṭan hlan a nghahhlelhawm tawh takzet a ni," a ti a, Como tan hmachhawp ropui tak a ni.

Como chief executive Dennis Wise chuan, "Football tana hna tam tak lo thawk tawhtu chu Como 1907 tana kan hmachhawp ropui takah a rawn tel ve dawn ta. Kum thum chhunga Serie A inpetkai ngei kan tumna kawngah, ani ang player ṭha leh tawnhriat nei ṭha hi an ṭangkai dawn a ni," a ti.

Player a nih laia England tana vawi 21 inlan tawh Dennis Wise hi Fabregas-a club hlui Chelsea tan a vanglaiin a lo khel ve tawh ṭhin a, inkhelh a chawlhsan hnuah coach niin Leeds United pawh a lo enkawl tawh.

World Cup 2010 champion team zinga mi Fabregas hian Arsenal aṭanga hming chherin, Gunners tan hian match 304-ah goal 57 khungin, assist vawi 96 a nei a, FA Cup leh Community Shield-ah nomawi chawipuiin, kum 2011 khan Barcelona-ah a kir.

Catalan club tan hian match 151 khela goal 42 khungin assist vawi 50 a nei a, La Liga, Copa del Rey, Supercopa de Espana, UEFA Super Cup leh FIFA Club World Cup-ah a champion.

Barca-ah season thum khelin, kum 2014 khan Premier League-ah a kir a, Chelsea a zawm - season li leh a chanve khelin, match 198-ah goal 22 khungin assist vawi 57 a nei a, Premier League (2), FA Cup, League Cup leh Europa League-ah champion nomawi a chawi leh thei.

January 2019 khan Arsenal tana a khelhpui ṭhin Thierry Henry-a'n AS Monaco a enkawl laiin French club hi a zawm a, match 68-ah goal li khungin, assist vawi kua a nei a, season hmasa kha hliam vanga inlan mumal loin, champion nomawi chawi a nei lo.

Fabregas hian duh ni se, European second division club tana khel loin sum tamna middle-east leh USA lam pawh a pan thei ang - mahse, Como pan a thlang a, hei hian mi tam tak mak tih a hlawh.

Mahse, Como chief executive Wise chuan Fabregas hian an inremna angin club-ah share a neih tur thu a sawi a, "Club neitu zingah a tel ve tawh dawn a ni," a ti a, hei hi Italian second division club a zawm chhan langsar niin a lang.

Kum 2017 khan Como hi suma an tlakchhiat avangin Britain company SENT Entertainment chuan an lei a, khatihlai khan Serie D an khel - tunah chuan Serie B club an ni leh tawh a, hna an thawk ṭha tih a lang.

SENT hi Indonesia tobacco industry-a hming langsar Djarum nena thawk dun an ni a, Djarum neitu Robert Budi Hartono hian dollar tluklehdingawn 22.3 vel a nei nia chhut a ni bawk a, Fabregas hoin an tum a sang khawp ang.