India tan weightlifting a hlu Olympic 2024-ah Jeremy nge Sheuli?

Commonwealth Games 2022 neih laiah India chuan gold medal pathum a la tawh a, a vaiin weightlifting huangah vek a ni. India tana gold medal la tawh pathum zinga pahnih chu hmarchhak mi Jeremy Lalrinnunga leh Mirabai Chanu te an ni.

India tana gold medal latu zinga pakhat, 73kg huanga chawitu Achinta Sheuli chuan Paris Olympic a thlir lawk a, ram aiawha fehchhuah kawngah Mizo tlangval Jeremy nen an inel tur thu a sawi, inelna hautak an hmachhawn dawn.

Nimin tlai thleng khan India hian a pumpuiah medal pakua a la tawh, heng zinga pasarih chu weightlifting aṭanga chawi chhuah niin, a dang pahnih chu judo huangah a ni thung - medal dang tam takin a la zui ngei erawh a rinawm.

Weightlifting leh judo hi India ṭhatna a ni a, chutihrualin inelna neih zawh hmasak an nih avangin medal lak hmasakna tiin a sawi theih ve bawk. Infiamna peng hrang dang chu khelh mek leh, khelh hmabak tam tak a la awm a ni.

Paris an thlir
Infiammite duhthusam chu Olympic champion nih a ni, champion hi thil awlsam a ni lo thung - champion chauh ni loin Olympic khel phak nih hrim hrim pawh a harsa. Tunah chuan Indian weightlifter ṭha pahnihin 73kg huang an inchuh dawn niin a lang.

Jeremy Lalrinnunga hi 67kg huanga khel a ni a, a tiatpui zingah amah tluktu an awm lo. Paris Olympic-ah hian ruahman dan chuan 61kg, 73kg, 89kg, 102kg, +102kg huangah inelna an nei dawn - Jeremy tan weight thlak a ngai dawn tihna a ni.

Thutlukna siam a la ni lo a, taksa rihna tih zan ai chuan taksa tih len bakah rihna tih san hreta 73kg huanga khelh chu Jeremy tan a remchang zawk dawn. Hei hi a elpui tur Sheuli chuan a lo hmu lawk kar mai a, rilru leh taksa a lo buatsaih lawk.

West Bengal tlangval, kum 20 mi Sheuli chuan, "Paris Olympic atan tlin ngei ka tum dawn a, ka khelhna tur category chu a pangngai 73kg a ni ang. Ka hmuh dan chuan ka ṭhian ṭha tak Jeremy Lalrinnunga pawhin hemi huangah hian a khelh ka ring.

"Chuvangin inelna hautak leh ṭha tak kan nei ngei dawn, tun hma aiin ka thawhrim zual a ngai dawn a ni," tiin a sawi. Tun ṭumah hian gold medal la turin 73kg category-ah hian 313kg (snatch 143kh, clean & jerk 170kg) a chawi a ni.

Australia chungnung
Commonwealth Games 2022-ah hian ram 72 aṭangin infiammi 5000 chuang an pungkhawm a, infiamna chi hrang 280 zet an bei mek. Nimin tlai thleng khan Australia chuan gold medal 31 an hlawh chhuak tawh a, an chungnung fal hle.

Inelna hi Great Britain ram awpna hnuaia awm tawhte tana buatsaih a ni a, Commonwealth Games a nih chhan ram neitu England chuan gold medal 21 an la ve tawh bawk, medal pumpui lak hnem lamah Australia hi medal 17 zetin an thlau mek.

Ram hrang 26 zetin medal an la tawh, tun hnaia ram talbuai leh sum leh paia buai tak Sri Lanka chuan bronze medal pakhat an hlawh chhuak ve tawh - an ram dinhmun leh boruak ngaihtuah chuan an tan thil lawmawm bik a ni ngei ang.

India tan medal pakua hi tawpna tur a nih a rinawm lem lo, medal lak chianna tura ngaih badminton an la hmachhawn dawn. Mipa leh hmeichhe hockey pawhin group match an khel ṭha viau, medal dawng turin beisiena a sang bawk.

Tun dinhmunah India hi parukna a ni mek, tun hnai Commonwealth Games hrang hrang thlir chuan a sang zual panga zingah chuan a tel phak a rinawm - chutihrualin ram dangte hmasawn dan hriat a la ni lo, engkim hi August 8-ah chuan chinfel a ni tawh dawn.