Osaka leh a pa thawkdun dawn

Coach nei loa awm mek Naomi Osaka chuan a pa Leonard Francois nen an thawkdun dawn tih a sawi a, tun season inelna an hmachhawn leh turah tun hma lama amah lo kaihruai tawhtu nen an inzui leh dawn tihna a ni.

Japanese star Osaka hi Wim Fissette nen an inkawp rem hle, Belgian coach nen hian kum thum chhung thawk dunin, a kaihhruaina hnuaiah 2020 khan US Open Australian Open nomawi a chawi hial.

A hnu lamah erawh Osaka hian hlawhtlinna chan a harsat, rilru lam buaina a neih bawk avangin a dinhmun pawh a chhe hman hle. A rilru buaina hi a reh tawh a, inkhel ve leh tawh mah se ngai a la awh leh lo.

Belgian coach Fissette nen hian an inṭhen a, a hnuah coach nghet a nei leh rih lo. World number 41 Osaka chuan, "Win-a nen khan hun nuam leh hlimawm tak kan tawng, engtik niah mah ka theihnghilh tawh lo ang.

"Taksa leh rilruin thil danglam a tawn a ngaih chang a awm, chutiang chu kan thlen avangin kan thawhdunna a tawp. Tunah chuan ka pa nen kan thawk dun ang, box aṭanga ka inkhel a lo en thei tur hi ka lawm hle," a ti.

Osaka-i pa Leonard Francois hian 2018 season khan a fanu hi a lo kaihruai tawh, hetih lai hian primary coach a ni. 2018 season hian French Open leh US Open nomawi a chawi a, tun season Grand Slam hnuhnung ber US Open atan beiseina an nei thei ang.