Team ṭha Mizoram Police-in chakin bul an ṭan

I Day Football-ah champion rinkai Mizoram Police chu nimin tlai khan an inlan a, Chhinga Veng 2-0 a hnehin bul an ṭan. Lalbiaksanga Colney hote hian goal chhuah loin goal hnih ngawt khung mah se chak turin vanneihna an mamawh a, nomawi an chawi dawn a nih pawhin kalkawng a awlsam dawn lo tih chu a chiang.

Police tan striker ṭha mi Malsawmfela chu minute 14-na lekah a rawn inlar a, Ramhlun South striker hian amah vengtu a bum hnuah amah chuh tumtu chu a su per a, goal ṭha bik a khung.

Police-in goal khung hmasa mah se inkhel an thunun thei lo a, Chhinga Veng game a mawi zawk a, an passing pawh a ṭha zawk. First half-a team pahnih danglamna chu Sawmfela tiin a sawi theih.

Second half-ah Police-in hmahruai theihna hun ṭha an nei a, midfielder H. Lalbiakthanga'n an penalty hmuh chu goal-ah pet mah se Chhinga Veng keeper RS Lalawmzuala'n a dansak.

Republic Veng tlangval Lawma'n Chhinga Veng beiseina a siam a, Chhingcows-in penalty an hmuh zui avangin point hmuh beiseina sang tak an nei. Serchhip tlangval Lalrinzuala a rawn pen chhuak a, goal kilah pet mah se keeper F. Lalmuanawma'n a dansak.

Chhinga Veng player naupanna a lang a, an hun ṭha neih an bawhpelh avangin an phurna a reh. Mizoram Police erawh tawnhriat nei ṭha rual an ni a, game ngai reng an khel thei thung. Minute 72-naah Armed Veng tlangval Lalbiakhlua'n (Hlutea) Police goal hnihna a khung a, Chhinga Vengin a chhanletna an nei lo.

Inkhel statistics aṭanga thlirin Chhinga Veng hi chak zo lo mah se Police nen an inhlat lo. Police hi goal khung tamah an chungnung a, a bakah Chhinga Veng an ṭha hret. Chhingcows hian shot vawi 11 neiin Police-in vawi riat an nei a, corner pawh vawi li neiin Police aiin vawi khatin an hmu tam zawk.